ارسم قلب
رمضان بدأ من كام يوم والصراحة بسبب الثانوية وامتحاناتها مش عارف أتابع حاجة أو أشوف حاجة لحد ما إن شاء الله أخلص الامتحانات.
بس إمبارح بالصدفة عيني وقعت على إعلان لمؤسسة مجدي يعقوب لعلاج الأطفال وبصراحة مقدرتش أمنع نفسي عن أني أكتب عن الإعلان وحلاوة الإعلان وحلاوة مجدي يعقوب -الراجل البركة-
الراجل ده يعتبر حالة صعب تتكرر تاني أصلًا وصعب أصلًا ييجي حد تاني زي مجدي يعقوب سواء في تواضعه أو محبته المتناهية لكل الناس دون تفرقة أو علمه طبعًا اللي الكل أجمع عليه.
بس خلوني أقول إن المخرج لولا أنه فعلًا برنس بمعنى الكلمة لولا أن الإعلان فعلًا حالة مميزة وفريدة.
مخرج الإعلان هو هشام جمال -مؤسس شركة روزناما- واللي برضه المؤسس لفرقة “boy band -بوي باند” واللي قدر يؤسس شركة "روزناما" وهو عمره 16 سنة.
وده اللي الصراحة خلى تأكيدي يزيد بأن النجاح أو الإبداع ملوش سن معينة لكن له أساسيات لو موجــودة في الإنسان يقدر فعلًا يبدع وينجــح في كل حاجة هو حاببها في الحيـــاة.
هشام جمال -مع حفظ الألقاب- قدر يثبت للكل أنك تقدر تبدع لو حابب فعلًا اللي أنت بتعمله ومؤمن بيه، مش بس كده! "لا أنت كمان تقدر تخلي الناس تصدق وتؤمن بموهبتك وإبداعك وحلمك بس لما تكون أنت مصدقهم ومؤمن بيهم جدًا".
وعلى فكرة مش معنى كلامي أن باقي الفريق اللي طلع لنا العمل التحفة ده مش مميزين! لا بالعكس سواء المؤلف أمير طعيمة بالكلمات أو مادي بالتوزيع أو اللي شاركوا في تقديم الإعلان كلهم فعلًا مميزون؛ وبجد بشكرهم أن وسط إسفاف وحاجات كتير ملهاش لازمة في الحياة قدموا لنا حاجة تفتح نفس الواحد على الحياة وتقوله لا لسه فيه أمل ولسه في حاجات كتير حلوة في الحياة بس أنت مش اللي مش واخد بالك.
