رضوى إبراهيم تكتب..عفوًا طفلك مرفوع مؤقتا من الخدمة

إيه يا جماعة ليه مستغربين من العنوان... طفلك عامل زي التليفون بالظبط وإخترت تشبيه التليفون بالذات لإننا بقينا مدمنين التليفون جدًا بشكل مبالغ فيه لدرجه إننا بننسى الدنيا كلها مش أطفالنا بس.. ولما التليفون يترفع من الخدمه بتحسوا إنكم إتعزلتوا عن العالم كله... الغريب اللي بجد إن لما طفلكم بيترفع من الخدمه مبتدوش له نفس الأهمية... وممكن مابتخدوش بالكم أصلا... ودايما شايفين إنكم مش مقصرين وإنكم بتأدوا واجبكم على أكمل وجه ومش عارفين فيه إيه... وليه الطفل إبتدى ينحرف عن الطبيعي رغم إنكم مقصرتوش !
طيب دا كلام؟!
يعني الطفل اللي عامل زي القماشة البيضة منه لنفسه كدا هيتغير ؟!
طفلي بيعاني من تكرار الكلام ( التهتهة) أو عنده تبول لا إرادي كل لما يعمل حاجة غلط
يا حاجة ارحمي ابنك من كتر الفرجة على أفلام الكرتون ومش عمال على بطال تزعقي قدامه... بلاش تضربيه ضرب مبرح ولا تخوفيه بالنار
إبني مش بيركز وبحس أنه غبي
يا سيتي في حد يقول ابني غبي وتلاقيكي بتقولي الكلمة دي قدامه
إنت غبي!
إنت مش نافع!ّ
والنبي ما أنت فالح!
وطبعا الباشا ابنك بيخزن كلامك في الذاكرة عنده وبيبتدي ينفذه زى ما إنتى قولتى له بالضبط. مش إنتى قولتى إن هو غبى ومش فالح... خلاص هو اقتنع بده وابتدى ينفذه
بدل لما تشجعيه وتقوى ثقته في نفسه. لأ إزاى لازم أنسف الثقة دى من جذورها
مش نرحم عيالنا من جهلنا شويه؟!
فضفضه النهارده مخلصتش لأن الموضوع فعلا كبير ولازم نلحق أطفالنا على الأقل وهما مرفوعين مؤقتا من الخدمة قبل ما يبقوا غير موجودين بالخدمه... انتظروني في نفس الموضوع الجزء التاني من فضفضة... عفوا طفلك مرفوع مؤقتا من الخدمة.