"إشارة روكسى" شعر كرم منصور

زعلان منك كما سواق
"إشارة روكسى" معاكسانى
اشتاق للعمر فى عيونك
يفوت العمر فى ثوانى
زعلان منك كما فنان
تخاصمه الشمس وتروْح
فى لحظة مسكه للريشة
زعلان منك كما غلبان
عايشها بس مش عيشة
زعلان منك كما شاعر
يخط المعنى بالضحكة
تخبى حزنه فى مشاعر
تنسيه انه إنسانى
زعلان منك كما كلمة
تبات ليلها ما بين
كتاب
سطوره
عايشة على الرصيف
زعلان منك كما وردة
باتت ربيع
صبحت خريف
زعلان منك كما شارع
شهد خطاوى ناس رحلوا
وناس خرجوا وناس دخلوا
بقا من ريحة خطاويهم
صورة فى عفش قديم
صلاة لجمعة حضروها
تعيد ريحتهم من تانى
زعلان منك كما دبلة
مرمية فى وش واد خاطب
كما نسمة فى عز الحر مكسوفة
تداعب شعر خطيبته
وتخلى الضحكة مكشوفة
صعب عليها الواد فدابت
فى قرص الشمس
وسامعة ضحكتها:
"ما دام الدنيا نسّاية
أكيد فى يوم هينسانى"!!