اختلفت المسميات والحب واحد
من كام يوم كانت الأمهات المصرية بتشغل أغاني من عينة "ست الحبايب يا حبيبة" وتقريبًا كده كانت كل الأمهات بتلمح لهدايا عيد الأم.
والصراحة إحنا كشعب زياط (بيموت في الزيطة) فالصراحة كنا منقسمين لفريقين؛ الأول منهم هو الفريق اللي غرق السوشيال ميديا – social media بصورة مع مامته مع بعض الهاشتاجات الغريبة اللي من عينة "#ست_الكل #الوطن #الحب_كله" وكأن السوشيال ميديا بقت شريط إهداءات (....) كملها أنت من مخك عزيزي القارئ بدل ما يتقال إن ده إعلان *إيموشن بيضحك*.
والفريق التاني الصراحة كان بيفقعني أكتر من الأول وهو اللي ماشي بمبدأ إعلان شوفته متعلق في مرة بيقول متقولش على المعاق معاق لكن قول من ذوي الاحتياجات الخاصة مع تحيات... لرعاية المعاقين.
واللي فضلوا يقولوا حرام تنزلوا صوركم وتحسسوا الناس أن أمهاتهم ماتت ومعرفش إيه ومتحسسهمش أنهم يتامى وكلام كده من عينة أغاني مصطفى كامل المجروح عاطفيًا فيها.
مع أن الصراحة اللي هما كانوا بيعملوه ده كان بيعصب أكتر يعني تخيل أنت تيجي تواسي حد علشان مثلًا فقد جزءًا من جسمه فتقوله معلش انت مش ذنبك انك بقيت (...).
غير كده النقطة اللي مش قادر أفهمها في الموضوع كله إيه لازمة أننا نخلي فيه مناسبات خاصة بالحب وأيام معينة بس؟! يعني ليه مثلًا منقولش للي بنحبهم إننا بنحبهم وبنقدرهم كل يوم من غير مناسبة؟!
ليه مجرد ما نصحى منرفعش سماعة التليفون سواء الأرضي أو المحمول ونتصل بحد واحشنا نقوله إنه واحشنا جدًا؟؟
ليه لما نصحى من النوم منقولش لعيلتنا إننا بنحبهم؟! أنا عارف كم المعاناة اللي هنشوفها بس نحاول.
شيء طبيعي أن أول جملة هنسمعها منهم هي "عاوز إيه خلص؟؟" أو "خش في الموضوع مش فاضيلك" بس ده لأن ببساطة إحنا اللي خلينا للحب أيام قليلة في السنة.
بحسبة بسيطة لو حسبناها هنلاقي أن اليوم فيه 24 ساعة والـ 24 ساعة دول فيها 1440 دقيقة والـ1440 دقيقة دول فيها 86400 ثانية فيها إيه لو خدنا منها 10 ثوان بس اديناها للناس اللي بنحبهم وقولنالهم فيها إننا بنحبهم بس مع ابتسامة مش يدوب تقضية واجب؟!
أوقات كتير ناس مبتفوقش غير عند موت الناس اللي كانوا في حياتهم؛ مشكلتنا دايمًا أننا بنعرف دايمًا قيمة الناس لما بتموت.
أنا عمري ما اتخيلت أني بحب تيتة أوي غير وهما بيحطوها في الصندوق؛ متستناش ليوم معين أو مناسبة معينة علشان تقول للي قدامك إنك بتحبه لأن صدقني ممكن تفوق بعد فوات الأوان.
خلي كل يوم يمر عليك هو عيد تعلن فيه حبك لكل اللي حواليك وحاببهم يفضلوا جنبك دايمًا؛ متستناش لمناسبة خلي كل دقيقة مناسبة تقولهم فيها إنك بتحبهم وإنك بجد عاوزهم يكونوا دايمًا في حياتك.
#أسامة_منير_طابع_عليا_معرفش_ليه؟!
#املأوا _الأرض_والفضاء_بتراتيل_السلام
#ست_الحبايب_يا_حبيبة
