علم صح (1)
دايمًا بلاقي الجيل الأقدم مني يقعد يتكلم عن مدرسينه أيام زمان بشغف أوي ويفضلوا يمدحوا في أستاذ فلان لأنه كان بيعاملهم بطريقة معينة أو محببة بالنسبة لهم.
أو علشان أستاذ فلان كان قريبا منهم بزيادة وكأنه أخ كبير ليهم قبل ما يكون مُعلما ليهم أو حد عنده سلطة أعلي فيحاول قهرهم بيها.
أنا خلال فترة ابتدائي مريت بمدرسين الصراحة مش قادر أنساهم مش علشان كانت معاملتهم حلوة؛ لأ خالص دول كانوا بيعاملونا معاملة كفار قريش لأتباع الدين الجديد.
يعني مثلًا ميس شيماء -معلمة اللغة العربية أيام أولى ابتدائي- الاسم إللي كان كفيل يخلي البيت كله مشدود يوم الأحد بليل استعدادًا لنكد هيبدأ تاني يوم الصبح لما والدتي تحاول أنها تصحيني علشان أروح المدرسة والسبب أن يوم الإملاء لازم تعرف أن قصاد كل كلمة تكتبها غلط هتضرب 4 عصيان.
غير بقي ميس سلوي بتاعة العلوم بتاعة خامسة ابتدائي؛ كانت كبيرة في السن وكانت شايفة أن أغلبنا إن شاء الله هيكون سببا في هلاك كوكبنا العزيز إللي إحنا عايشين عليه؛ فكانت بتحاول تاخد حق البشرية مننا من قبل ما نطلع للدنيا يعني الواجب مش سؤالين علل وكده لا خالص يبقي شغل على كبير وجو مقارنات وكأنك رايح امتحان الثانوية.
لكن جيت للسنة دي وإللي زي ما بيسموها بعض مدرسين الثانوية العامة أو كل الناس أصلًا عنق الزجاجة أو المرحلة الحاسمة واكتشفت أن أصلًا كنا بنتعلم غلط!
يعني مثلًا أستاذ مصطفى فريد -معلم اللغة العربية- بيبهرني كل حصة بحضرها معاه بيحسسني أن المنهج مش منهج أصلًا؛ قصة الأيام وإللي الكل بيشوفها قصة معقدة بيبقي كفيل أنه يقلبها حكاية مسلية جدًا،غير أسلوبه المميز جدًا في شرح النحو وهو بيوصل الدرس من خلال عبارات صغيرة لو الواحد كتبها معاه هيضمن أنه يحل صح وجدًا.
غير بقي لو اتكلمنا عن طريقة شرح النصوص ودروس القراءة، ببساطة بيحاول يقدم المعلومة بطريقة مبسطة تثبت في مخ الطالب مش نظام حفظ قد ما هو فهم.غير بقي مدام سلويـ، مدام سلوي دي بعتبرها خالتي قبل ما تكون معلمتي في اللغة الفرنسية.
في أولى وثانية ثانوي كان كل هم المدرسين يخلونا ننجح ونعدي، لكن مع مدام سلوي الموضوع بيختلف بتنقلك من مرحلة الحفظ علشان تنجح وتعدي لمرحلة تفهم علشان تقفل وتتميز.
وطبعًا في أسماء كتير زي مستر نزيه العدوي -أستاذ سيد عراقي - أستاذ نبيل الشناوي - أستاذ مصطفى رسلان - دكتورة منال وديع و‘للي تعتبر بريمو في الجيولوجيا تفهم وتحفظ وتقفل التمتحان وأنت قاعد قدامها وفي طبعًا ناس كتير مبدعين في التدريس غيرهم.
ببساطة الناس دي بتحاول تخلي الطالب ينتقل من مرحلة أنه بينفذ حكم أو عقوبة لمرحلة لا نضيف المرح للتعليم علشان نخرج واحد قادر على أنه يكون حاجة في حياته قدام.
لذلك لو أنت مدرس أو مدرب أو محاضر متبقاش دايمًا بتحاول تدي كم كبير من المعلومات لكن حاول تعرف إزاي توصل المعلومة بطريقة صح للطالب أو الشخص المتلقي للمعلومات قدامك.
والمقال الجاي هنبدأ نتكلم عن إزاي تقدر توصل المعلومة بطريقة بسيطة وحلوة للطالب إللي قدامك.
twitter:PaulaWagih.com
