«قول كلمة للجنيه» يفجر سخرية المصريين.. محمد: نخرمه ونبيعه ميدالية الواحدة بـ9 جنيه.. نورهان: «مش هتكبر بقا وأشوفك زي الدولار».. عبد النبي: «عمت وغرقتنا معاك».. سلامة: تر
![صورة تعبيرية](images/no.jpg)
دشن نشطاء تويتر هاشتاجا ساخرا بعنوان "قول كلمة للجنيه"، جذب مئات المصريين ليحتل مركز متقدم في تراند مصر.
وخصص النشطاء الهاشتاج للسخرية من انخفاض سعر الجنيه أمام الدولار، بعد أن سجل الدولار ارتفاعًا غير مسبوق بعدم تجاوز سعره 9 جنيهات، وبخفة الدم المعهودة للمصريين قدم بعضهم حلولا ضاحكة لرفع قيمة الجنيه أمام الدولار.
نخرمه
قال محمد عابدين "قول كلمه للجنيه المصري.. الحل الوحيد علشان ننقذ الجنيه إننا نخرمه ونعمله ميدالية ونبيع الواحدة بـ9جنيه"، وعلقت نورهان هندام "مش هتكبر بقا وأشوفك زي الدولار.. قول كلمه للجنيه المصري"، ورد كريم رفعت "قول كلمة للجنيه المصرى.. بابا عاوز دولار أصل الجنيه مبقاش يعمل حاجة".
وأضاف حازم الشناوي "قول كلمة للجنيه المصري وسمعني أغنية.. أنا خدت الضربة بجد لأبو الليف"، وسخرت وايت جاسمين "قول كلمة للجنيه المصري.. الله يرحمك كنت في حالك لما العملات كانو بيطلعوا وينزلوا مع بعض في الفسحة كنت ديما تقعد جنب الحيط وتخاف حد يزقك".
غرقتنا معاك
وتابع عبد النبي "قول كلمة للجنيه المصري.... عمت وغرقتنا معاك، ولا عاد ليك 30 لازمة".
وقال محمد الشافعي " إلحق غرييييييبييييبيييق.. قول كلمة للجنيه المصري"، وأضاف هشام مبارك "قول كلمة للجنيه المصرى.. ياواحشنى رد عليا إزيك سلامات"، وعلقت أميرة على "الله يقومك بالسلامة.. قول كلمه للجنية المصري".
وسخر محمد "شدة وتزول يا بطل وسط تآمر الجميع عليك.. قول كلمة للجنيه المصري"، وتابع ريمو "قول كلمة للجنيه المصرى.. نفسى أعيش وأشوفك جنيه ونص قد الدنيا"، وسخر المصري "مش هتسترجل كده وتبقى دكر وسط العملات.. قول كلمة للجنيه المصري".
قتلت الفرحة
وقال سلامة محمد "قول كلمة للجنيه المصري.. تروح أمريكا تعمل الصح مع الدولار وتخلفلنا سنتات كده بدل القروش، بكده تاخد الجنسية وترجعلنا دولار"، وأضافت أميرة عواد "نفسي أشوفك مره بتغطس ولا حتى بتغرق طول عمرك عايم.. قول كلمة للجنيه المصري".
ورد عبواحد "قول كلمة للجنيه المصري.. ياريت وأنت نازل تاخد كيس الزبالة معاك"، وتابع أسامة الزناتي "قول كلمة للجنيه المصري.. أنت اللي عملت في نفسك كده".
وسخر سامح الريس حنتيرة "قول كلمة للجنيه المصري.. ليه كدا يا أخي حرام عليك.. أنت ليه يا أخي بتقتل الفرحة جوانا ليه".
شوف لك عقد وقال محمد شعبان "اتكل على الله وشوف لك عقد عمل في الخليج.. قول كلمة للجنيه المصري".
وعلق محمد بيانو "قول كلمة للجنيه المصري.. ما نلغي الجنيه ونمشيها كتب مزيكا أفلام" وأضاف خالد عصام "قول كلمة للجنيه المصري.. ربنا يجعلها آخر الأحزان بإذن الله".
وتابع سيد قطب "بقي الـ ٩ جنيه منك بقوا بـ ١ دولار! مش مهم... قول كلمة للجنيه المصري" ورد شريف عماد "قول كلمة للجنيه المصري.. كان طيب كان حنين كان غلبان وفقير واتبهدل أوى واتقطع ومبقاش بيجيب جرجير".