رضوى إبراهيم تكتب: جبت الدبدوب يا كوكو والسلسلة الأنفينتي

 «عيد الحب»، سواء المصري 4 نوفمبر، أو العالمي 14 فبراير، ييجي من هنا، والحياه تبقى حمرا .. ورود حمرا .. دباديب حمرا .. والجديد السلسلة الأنفنتي .. واجب لابد منه! .. وبعد لما اليوم يعدي عادي جدًا نرجع نزعَّل بعض! نهمل بعض! طرف يبعت رسالة للآخر أو يتصل، والتاني يتجاهله ويطنش .. فلَّة .. أصل الواجب خلص، وجبرت على كدا.

طيب .. هو عيد الحب بنحتفل بيه ليه واحنا مش حاسين بيه؟ مش لازم الأول نعرف يعني إيه حب قبل ما نعمله عيد؟! هو الحب دبدوب وورد وسلسلة إنفتني بس؟!

هو إحنا عارفين يعني إيه حب أصلًا؟!
ليه متناقضين في حياتنا؟ بمعنى .. ممكن نهمل اللي بنحبهم .. أو نحرجهم .. وممكن نكسر خاطرهم .. وبعد كل ده نحتفل بعيد الحب!

هو احنا بقينا حافظين مش فاهمين؟ ولا احنا فاهمين ومستعبطين؟!
مزهقناش من الروتين والعصبية .. والضحك والخداع باسم الحب؟!
لكن مافيش إنسان مطلق الشر ولا مطلق الخير!

النفس البشرية زهوقة .. والحب فطرة .. يعني الإنسان مولود ومعاه الحب والعاطفة والسلام النفسي!
هو العيب في الدنيا ومشكلاتها، ولا في كم الضربات اللي أخدناها في حياتنا؟! ولَّا بسبب ظننا اللي خاب كتير؟! ولَّا يمكن يكون السبب في التكنولوجيا المخيفة اللي قربت كل حاجة مننا ففقدنا طعم الحياة، وبالتالي طعم الحب!

ما إحنا كنا زمان بنحب بعض، إيه اللي حصل لنا؟!
الحب مش محتاج عيد!
الحب مش دبدوب وسلسلة إنفينتي!
إحنا وصلنا لمرحلة إن كل يوم الحب بيقل شوية بشوية .. وده خطر .. لأن الحب هو أكسجين الحياة .. ولو الأكسجين خلص .. هنموت.

عرفوا إن اللي بيستحملكوا ويجري وراكم رغم عدم اهتمامكو دا مش قلة كرامة منهم .. دا حب .. وخوف من إنكم تبعدوا عنهم.

خلوا عيد الحب السنادي بداية جديدة .. إننا نحب بعض، ونخاف على بعض .. واعرفوا إن الحب مش تسبيل ولا دبدوب ولا مقتصر على إنه يكون بين راجل وست.

الحب صفه أساسية إنسانية .. دا مش كلام إنشا ولا كلام مثالي وخلاص 
إفرحوا .. علشان الحياة قصيرة

معاكم إن كدا ميتين وكدا ميتين .. لكن منخلهاش عيشة والسلام .. النكد والكره بيقصَّروا العمر .. عمركم بيتسرق .. افرحوا واعرفوا إننا في الدنيا دي مجرد ضيوف لازم نلتزم بقواعد الأدب فيها لأننا فيها مجرد ضيوف ..

إنتم عارفين إن معادلة الحب بتقول إن الحب = احترام + اهتمام + تقدير .. يا ريت المعادلة دي نمشِّيها على كل اللي حولينا، سواء كان أم .. أب .. أخ .. أخت .. زوج .. زوجة .. الجيران .. الناس اللي في الشارع .. يالَّا نبدأ ونحب بعض.