حملة «أتجوز ليه؟» تجتاح «فيس بوك».. نور: «هاتيلي كوباية ميه».. رنا: «جوزي يؤكلني على حسابه».. أحمد: «أخون مراتي مع الشغالة».. رحمة: «يضايقني وينا
![فيتو](images/no.jpg)
دشن مستخدمو موقع التواصل الاجتماعى «فيس بوك» حدثًا حمل عنوان «أتجوز ليه؟»، تفاعل معه الكثير من النشطاء، وتضمنت فكرته تحفيز المستخدمين على نشر آرائهم حول الزواج، عبر السؤال التالى «إيه اللى ممكن يدفعكوا لتلك الخطوة يومًا ما؟»، ومن جانبها رصدت «فيتــو» بعض التعليقات.
مش هتجوز أصلًا
قالت «رحمة سعيد»: «أنا مش هتجوز أصلا أتجوز ليه؟ عشان واحد ييجي يصحيني من النوم، ويسألني على شرابه اللى ضيعه، أتجوز عشان واحد يضايقني وينام جنبي على نفس السرير، لا طبعًا أنا أنام لوحدي براحتي، بلا جواز بلا نيلة، أنا عايزة أخلص دراسة واشتغل وأسافر واكسب فلوس، وأعيش حياتي بالطول والعرض براحتي بلا جواز بلا قرف».
وغردت «رنا» ساخرة: «هتجوز عشان جوزي يؤكلني على حسابه».
وتابعت «سهام»: «مش شايفة أي سبب مقنع الحقيقة يعني يخليني أعمل العملة المهببة دي».
عشان استقر
وقال «أحمد محمد»: «أتجوز عشان استقر بقى وأكمل نص ديني، وأعيش حياتي مع البنت اللي بحبها وبتحبني».
وتابعت «نور» قائلة: «لا أنا مش هتجوز أصلا أتجوز ليه.. عشان واحد يصحيني من النوم يقولي قومي هاتيلي كوباية ميه».
واستطردت «مها»: «عشان محدش كل شوية يقولي قومي اغسلي المواعين يا زفتة».
وقال «عمر خيرى»: «هتجوز عشان ألاقي حد يطبخ لي ويغسلي و... و، عشان أمي ربنا يديها الصحة مش هتستحملني كتير، آخرها سنة كمان وهتطردني بره البيت».
وأضافت فتاة أخرى قائلة: «عشان ألاقى حد أناكف فيه بدل الملل والزهق».
أعمل الشقة باللون البنفسجي
وشاركت «مروة أحمد» قائلة: «عشان أكمل حياتي مع شخص وأديله كل حبي واهتمامي، ونستقر بعيد عن البشر ويكون ليا ومن حقي».
وقالت «آية سعيد»: «هتجوز عشان أعمل الشقة باللون البنفسجي وأجيب كل حاجة بنفسجي، وعشان أبقى مطمنة بوجود زوجي جمبي سند، وكمان نسافر إن شاء الله سوا».
وأضافت «زينب الهواري»: «عشان أبقى مع حبيبي وجوزي وأبو عيالي ربنا يخليك ليا يا أبو حمزة».
أخون مراتي مع الشغالة
وعلّق «أحمد كمال» ساخرًا: «هتجوز عشان أخون مراتي مع الشغالة وتقعد تقولي عيب يا سي أحمد ستي تشوفنا».
وقالت «ريهام»: «عشان أحبه أوى ويحبنى وأفضل أرخم عليه ليل ونهار».
وتابع «محمد فتحى»: «هتجوز عشان لما بسافر حاجات كتير بتعجبني بس مببقاش عارف اشتريها لمين، عشان عايز أسافر معاها عشان تعملى أكل وأقولها إيه القرف ده واخدها وناكل بره أهم حاجة تقتنع إن الأكل طعمه فعلًا زي الزفت عشان نلعب سوا استيمشن».
وقالت أميرة الساهر: «عشان أنكد عليه وأطلق وأرجع لأهلى من تانى يوم، وأبهدله في المحاكم عشان الشقة والمؤخر».