14 اختلافًا في صلاة التهجد لـ«الهاي كلاس» في مصر.. أهمها «كارت دعوة»
تداول نشطاء «فيس بوك» قصة رواها أحد النشطاء عن دعوة تلقاها لصلاة التهجد مع صفوة المجتمع المصري، ورصد فيها الفروق بين صلاة في مكان 7 نجوم عن صلاة المسجد.
وجاءت أهم الاختلافات في أن الصلاة بـدعوة مطبوعة "invitations "، والخضرة والمياه وأيضا "البنات الحلوين" يحيطوك في كل مكان.
وفيما يلي نص رواية الشاب: "امبارح صليت التهجد صلاة Continental في مكان سبع نجوم مع ال crème de la crème بتاع مصر والله في ليلة من أحلى ليالي العمر، الموضوع جه أن صديق قاللي إنه يعرف حد يعرف حد بيجيب في الكمبوند داعية مشهور أوي*بدون ذكر أسماء* ياخواننا وبيبقي في كلام في الدين على الضيق كدة في جنينة".
وأضاف: "الموضوع شدني خاصة اني كنت من عشاق الداعية ده في فترة من حياتي المهم الموضوع طلع مش درس.. طلع خطبة وصلاة تهجد زي اللي بيتعملوا في أي جامع لكن مع شوية اختلافات بسيطة أحب اشاركها معاكوا عشان نتعرف مع بعض على أحدث صيحات الصلاة ال A Class في مصر".
واستطرد في حكايته على صلاة التهجد الـ7 نجوم والفارق بينها وبين الصلاة في المساجد فيما يلي:
- الموضوع مطلعش على الضيق، تقدر تقول من عدد العربيات اللي برا انهم من 500 شخص وتقدر تقول من مستوى العربيات انك داخل قطامية هايتس أو مراسي.
- في invitations مطبوعة وفي بنات واقفة على الباب بتتأكد أنك معاك invitations.
- تعدي الباب.. تلاقي ushers أغلبيتهم بنات محجبات حلويين أوي D: لدرجة أن أنا وصاحبي قلنا في نفس الوقت نفس الايفيه لبعض "هما دول حور العين ؟؟"
- الـ ushers بياخدوك وسط ممرات الجنينة اللي مليانة خنادق نازلة لتحت ونخل قصير وبحيرات صناعية صغيرة وأضواء خافتة رومانسية تملأ الحديقة اللي مليانة ب crowd اشبه بحفلات جنزوري ويقعدوك عشان تسمع الخطبة في تكعيبة (مكان نازل لتحت كدة بحيث وانت قاعد تبقي في نفس مستوى المياه) مجموعات ولاد قاعدين وفي التكعيبة اللي جمبهم مجموعات بنات عادي يعني.
- العدد كان اكتر من 500 بكتير جدا والout fit كان كاجوال لكن ضيف عليه الاسدال المحطوط على إيد البنات استعدادا للصلاة بعد ما الخطبة تخلص (ميمنعش أن كان فيه محجبات برضه)
- قبل الخطبة حصل تحية شخصية في الميكروفون لكبار الزوار الموجودين معانا انهاردة وتم شكر ال CEO 's الموجودين هما واخرين على تبرعاتهم للتجمع ده.
- الخطبة نفسها كانت حاجة سوفت ورايقة وبتوعد بمغفرة كل الذنوب في خلال 3 ساعات لو اخلصنا النيّة عشان محدش يزعل نفسه.
- الخضرة وبحيرات الماء والصحبة الحلوة تسيطر على المشهد.
- الداعية كان بيهزر مع ولاد وبنات هو عارفهم بالاسم في نص الخطبة مما نشر روح الدعابة والألفة وBreaking the ice بين ال Crowd.
- الولاد والبنات بيتوضوا مع بعض في حوض كدة في طرف الجنينة في سلام مبتسمين وقابلت بس هناك 3 بنات كانوا معايا في الجامعة واتفقنا اننا لازم نتقابل في العيد.
- الصلاة بدأت والركعة كانت حاجة سبور كدة متزيدش عن 3 - 4 دقائق عشان الناس اللي لياقتها البدنية ضعيفة أو ملهاش تقل على الصلاة.
- متشوفش بقي راجل بسيط ولا واحد لابس جلابية ولا سدة النفس دي... ال Door selection عامل اللي عليه وزيادة.
- بعض البنات كان قلبها أبيض وبتصلي في الممرات عادي قدامك، وصفوف الولاد مفيهاش تدقيق على حكاية القبلة ومساواة الصفوف والكليشيهات دي.. احنا ناس لارج.
- ملحقتش فقرة السحور ومع ذلك اتحكالي أن كان فيها socialization رايق جدا لكن الحمد لله روحت مبسوط من التهجد بارتي ولم ينقص اليوم غير أن الأستاذ الداعية يطلع ال DJ set بتاعته ويلعبلنا حاجة مما فتح الله عليه من الديب هاوس لكن معلش بقي هنقول ايه الجايات أكتر...
الناس كانت حلوة والصلاة كانت حاجة Agreable كدة وكل حاجة كانت مظبوطة، أنا عن نفسي سعيد جدا بالـ Version الجديد من الإسلام الكاوتشوك ده اللي بيمط معاك وبيرضي طموحنا كطبقة عالية في خروجة نضيفة ممكن تتعرف فيها على صحاب جداد وتقابل فيها صاحبتك الجديدة أو تطلعيلك منها بعريس خريج AUC وبيشتغل في BP وفي نفس الوقت بيضمنلك ثواب وأجر مش بطالين في ليالي مفترجة.. وعجبتني جدا فكرة الصلاة اللي ب invitations وهتكلم مع امام المسجد اللي جمبي انهردة بليل اننا نمنع دخول الشرابات ونقلب المسجد invitations only ونخليه للي بيسمعوا jazz من المعادي عندنا بس.
