أطرف مواقف النحس لنشطاء «فيس بوك».. محمد: أول يوم أهرب اتقفشت.. هبة: شربت صابون بدل العصير.. طارق: عيد ميلادي 29 فبراير.. عاصم: سافرت الكويت والشركة ولعت قبل ما اوصل

تمر على الإنسان لحظات يعرف جيدا أنها ليست من أوقات حظه ويبدأ النحس يطارده ويلحق به في كل مكان تطأه قدماه، بالرغم من أن بعض تلك اللحظات "المنحوسة" تسبقها لحظات بالانتصار، لكنه سرعان ما يتحول الأمر إلى سعادة مؤقتة. 

روى نشطاء موقع التواصل الاجتماعى مواقفهم التي شعروا خلالها بالنحس

كارت الـ 25
قال أحمد ساخرا:" مرة كنت ماشي بتكلم في الفون، لقيت كارت بـ 25 جنيه اتصالات من كتر الفرحة الفون وقع وغيرت شاشته بـ 1300 جنيه، من ساعتها لما بلاقي حاجة بطمن على الفون أنه في جيبي الأول".

 أول يوم أهرب

أضاف محمد:" أيام المدرسة كنت ملتزم أوي خاصة بالحضور والانصراف وكان زمايلي كل يوم يزوغوا وفي يوم قررت إني أعمل زيهم، وخرجت من الفصل وروحت لمكان السور اللي بيهربوا منه، وحاولت اطلع من عليه بسرعة وكان عالي وفيه صعوبة شديدة لدرجة أن هدومي اتقطعت، وبعد ماطلعت في الشارع وقفت انفض هدومي لقيت الفصل كله طالع من البوابة علشان المدرس ماجاش".

وروي إبراهيم:" قعدت 20 سنة مانزلتش مصر، والأربع سنين اللي نزلتهم حصل فيهم ثورتان واتغير 4 رؤساء".


شربت صابون بدل العصير

قالت هبة:" كنت في الصيف والدنيا حر أوي، ولقيت ازازة مليانة عصير مانجة، وروحت شاربها مرة واحدة وعنيك ماتشوف إلا النور طلعت صابون سائل".


 29 فبراير

أضاف طارق:" عيد ميلادي 29 فبراير".

قال عبد الرحمن:" جاتلي منحة ألمانيا، ولما روحت وزعوا الخبرات المتبادلة ورجعت مصر".

وأضاف بيكو:" لسه من يومين بشحن كارت 100جنيه وموبايلى بشريحتين اتصالات وفودافون، وعامل المكالمات على فودافون وبشحن لاتصالات وكتبت الرقم وبعت وقطعت الكارت ورميته، وبعدين لقيت رسالة بتقول الرقم غير صحيح، ونسيت إني عامل الاتصال على فودافون مش اتصالات، من ساعتها بقا وانا مش قادر اتكلم ولا آكل".

 الموبايل

قالت مي:" كنت في ثانوي وواد مز كان بيبصلي جامد أوي، افتكرته معجب من كتر اهتمامه، جه يوم الدرس ومعاه مامته، وجه وقف جنبي وبص في عنيا، وقالي بعد إذنك واخد فوني وعطاه لمامته وقالها دا اللي عاوز زيه".

وروت ريهام:" كنت بحب واحد بس هو كان فقير، وكان لسه قدامه كتير عشان نتخطب وكدا، وفي نفس الوقت اتقدملي واحد غني، فوافقت واتجوزته وقولتله أهلي غصبوا عليا ومعرفش ايه، وبعد خمس سنين جوزي فلس وحبيبي سافر وفتح مكتب هندسة خاص ليه، وبقي غني جدا ماشاء لله، انا والنحس قصة عشق".

أم العروسة ماتت

أضاف جيفارا:" كنت بحب بنت وروحت اخطبها ومعايا أهلي سمعت من على السلم صويت، أمها ماتت وقمة النحس أنها بقت مراتي دلوقتي".

الشركة ولعت
وقال عاصم:" سافرت الكويت عشان اشتغل والشركة ولعت قبل ماوصل بساعة".