بالصور.. أطرف مواقف النشطاء «تصرفوا خلالها بغباء».. فوزى: «طلبت قهوة بالبن».. إسلام: «رنيت الجرس والنور قاطع».. ياسمين: «اشتريت نعناع بدل الملوخية».. ونورهان: &

يمر الإنسان بلحظات من التفكير المشوش وتبعثر الأفكار، والذي قد يسميه البعض لحظات سيطرة الغباء على تصرفات ذلك الشخص مما يجعله يقدم على أفعال قد يتساءل فيما بعد متعجبا لماذا أقدم على فعلها، ذكر نشطاء موقع التواصل الاجتماعى "فيس بوك" مواقفهم التي اتسمت بالغباء كما وصفوها، في إطار كوميدى.

الاسم المكرر
قالت أمنية: "وأنا صغيرة كنت بقول إزاي أخويا يبقي اسمه "أحمد يحي أحمد" وانا اسمي "أمنية يحي أحمد"، ليه اسمي مش متكرر، اكتشفت لما كبرت إنه اسم جدو".

قهوة بالبن
وروي فوزي: "دخلت على الراجل بتاع محل البن وكنت تعبان ومطبق ومش مركز، كنت عايز قهوة بالبندق فمركزتش وبقول للراجل لو سمحت عايز قهوة بالبن الواد اللي كان معايا ضحك والراجل كان هيموت ويضحك، فضلت ربع ساعة رأسي وألف سيف إنه يجبلي قهوة بالبن، الراجل آخر ما زهق نده على الواد اللي في المخزن جوا وقاله هاتله قهوة بالبن، وده مات من الضحك هوا كمان لحد ما ترجمت في الآخر مدي غبائي".

دفعت 65 بدل 56
أضافت أسماء:" رحت اشتري جزمة قالي بـ 56 جنيها، قولت له مينفعش كده نزلي في السعر شوية، قالي اللي تؤمري بيه، قولتله هاخدها بـ 65 جنيه، الراجل استغرب وماصدق، بعد ما خرجت أدركت غبائي ومن ساعتها وأنا مبشتريش جزم لوحدي".

وعلق على ساخرا: " كان أبويا سايق وبيقول على واحد كسر عليه الطريق ياغبي، فرديت عليه قولتله نعم، عشان كان دايما يقولي ياغبي".

الموبايل الضائع
قالت نورهان:" مرة كنت ماسكة الموبايل في إيدي وبكلم ماما وكنت في الشارع وأنا بكلمها فتحت شنطتي وفضلت أدور على الموبيل مع أنه في أيدي وبدور عليه، وأنا بكلمها قولتلها استني هروح أشوفه عند السوبر ماركت اللي كنت لسه واقفة عنده، روحت سألت الراجل اللي في السوبر ماركت قولتله لو سمحت مشوفتش الموبايل بتاعي هو لونه أسود كده، ولكم أن تتخيلوا الراجل اتفتح في الضحك وأنا واقفة شبه العبيطة، مش فاهمة بيضحك على إيه، وماما الله يسامحها من كتر الضحك أصلا مش قادرة تقولي إن الموبايل في أيدي، بعدها أما مسكت نفسها شوية قالتلي أومال إنتي بتكلميني إزاي يا بت العبيطة".

وأضافت ياسمين ضاحكة: "روحت اشتري ملوخية لماما جيبت نعناع، وبقولها جيبالك ملوخية ريحتها حلوة كمان".

برن الجرس والكهربا قاطعة
روي يوسف: "كان امتحان انجليزي وصاحبي قاعد ورايا بيقولي club يعني إيه، قولتله نادي، هو يابنيclub يعني إيه، أقوله نادي، اقوله يابني نادي، المراقب سمعه وأخد ورقة الإجابة وشال المادة، الغبي فاكر إني بقوله نادي يعني نادي بصوت أعلى من كده، ههههههههه أحلي سباك في الشارع دلوقتي".