بالفيديو.. «فيتو» ترصد آراء المواطنين في تغيير وزير الداخلية..«مني»: «كان المفروض يتم من فترة كبيرة».. «أحمد»: «أسوأ فترة عاشها الشعب المصري في عهده».
استقبل اللواء محمد إبراهيم عقب عودته من زيارته إلى السويس للاحتفال بيوم المجند، قرار استبعاده من منصبه كوزير للداخلية وتعيين اللواء مجدى عبد الغفار رئيس جهاز الأمن الوطنى بدلًا منه في تغيير وزارى مفاجئ.
تجولت عدسة "فيتو" لرصد ردود أفعال المصريين في التغيير الوزارى، الذي أطاح بثمانى وزراء على رأسهم وزير الداخلية على وجه الخصوص.
«خطوة إيجابية»
قالت منى: "كان مفروض يتم إقالته من فترة كبيرة وخصوصًا بعد المجازر التي حدثت في عهده"، بينما قال محمد: "مستوي الأمن في الشارع المصري تدني بشكل غير طبيعي في عهده".
وأضاف محمود: "دى خطوة إيجابية وقرار سياسي وصح والتغيير مطلوب في ظل الظروف المحيطة بالبلد ولازم يأتي شخص آخر ذو كفاءة وخصوصًا في تلك الوزارة بالتحديد لأن استقرار أمن البلد تحدده بشكل كبير وزارة الداخلية".
«قرار صح جدا»
وقال أحمد: "أسوأ فترة عاشها الشعب المصرى في عهد محمد إبراهيم يعني إيه وزير داخلية ميقدرش يتعامل مع كمية الانفجارات اللى حصلت في البلد في الفترة الأخيرة"، وقالت علا: "أحسن حاجة اتعملت إنه إتشال وده قرار صح جدًا".
وأضافت عزة: "السيسي شالوا علشان الانفجارات اللى بتحصل دى اللى بيروح فيها أرواح ناس كتير ملهاش ذنب في حاجة وممكن يكون مجدى عبد الغفار ده شخص كويس وأهو لسه هنشوفه وربنا يوفقه"، بينما قال "علاء": "لا أنا ضد التغيير ده الصراحة كانت في حاجات أهم من تغيير الوزراء".
«الوضع الأمني المتذبذب»
وقال "فتحى": "طبعا كان لازم يتشال علشان الوضع الأمني المتذبذب الفترة دى وأنا عن نفسي مبسوط من الخطوة دى"، وقال"هانى": "ده تغيير سياسي من اختصاص الدولة ملناش إننا ندخل فيه هما لديهم خبرة في اختيار الوزير ده وزير كويس وده مش كويس ووزير مقصر والظروف اللى مرت بيها البلد وتعتبر تغير كويس لأنه هيدخل في تحديات كتيرة جدا في الوقت الصعب ده".
وقال "محسن": أنا شايف إن في الفترة الأخيرة في مساوئ كتير اتعملت محدش راضى عليها وفى حاجات تانية بردو كويسة اتعملت يعنى في الوقت الحالى شايف إن البلد على كف عفريت فيها حاجات مش كويسة وفي الوقت ده لازم الواحد يصبر شوية وربنا يقدم اللى فيه الخير".
