بالصور.. مصري يفاجئ زوجته بهدية غير متوقعة
تداول نشطاء مواقع التواصل الاجتماعى مفاجأة أعدها زوج مصرى لزوجته ليثبت أن المفاجآت التي تراها عبر مواقع التواصل الاجتماعى يمكن أن تصبح حقيقة.
روى الزوج حكايته قائلا: "زوجتى جت في مرة تحكيلى على قصة إن فيه واحد قرر يعمل مفاجأة لزوجته وفعلا جابلها ورد وشةكولاتة وحطها على كنبة العربية اللى ورا ولما نزلوا العربية قالها مدى إيدك هاتى المناديل من الكنبة اللى ورا وكانت المفاجأة".
وأضاف: "اللطيف في القصة دى أن كل صديقات زوجتى قالوا ومين يعمل كده ودى قصة خيالية وتقريبا إن الغرض من القصة دى إن الكلام ده ما بيحصلش يعنى، فأنا قررت أخليها حقيقية بس بشكل تانى".
استطرد الزوج: "اتفقت معاها إننا نخرج ناكل بره وأصريت لأنه لو ما نزلتش من البيت مش هعرف أعمل المفاجأة، رحت اشتريت ورد مجفف ريحته حلوة وبوكيه ورد حلو وعلبة شوكولاتة من النوع اللى بتحبه وفضيت شنطة العربية كلها ومليتها ورد مجفف وحطيت البوكيه وعلبة الشوكولاتة مع ورقة مكتوب عليها بحبك".
وقال: "فضلت أفكر هو أنا إزاى هخليها تفتح شنطة العربية؟ طب الراجل قالها هاتى المناديل أعمل إيه أنا بقى؟.. قلت خلاص هخليها تجيب المناديل من الشنطة مفيش أي إبداع، نزلنا وقبل ما نقرب من العربية جت في دماغى فكرة تانية قولتلها خدى إزازة المية حطيها في شنطة العربية عشان هعدل الجزمة، واستنيت أما بقيت في مرمى المفاجأة رحت فاتح شنطة العربية بالريموت زوجتى وقفت قدام العربية متسمرة، الحقيقة أنا كنت خايف ما تعجبهاش الهدية، أصل أنا خبيت داخل علبة الشوكولاتة خاتم دهب وهى لسه ما تعرفش حاجة".
واختتم قصته قائلا: "أخدت العلبة بتاعت الشوكولاتة جوة العربية بعد المفاجأة الأولى ولسه بتاخد أول واحدة شوكولاتة لقت الخاتم جواها وعجبها جدا الحمد لله"
