بالفيديو.. "فيتو" للأطفال: تتمني إيه في 2015؟.. عايز آيفون.. محمود: الزمالك يخسر علطول.. مصطفى: أنجح علشان بابا وماما ميزعلومش مني.. حسن: أكون مهندس علشان ماما متقعدش تبيع في الشارع.. أحمد: ربنا موجود
ارتبطت شخصية "بابا نويل" أو "سانتا كلوز" بعيد الميلاد، وتُعرف بأنها رجل عجوز سعيد دائمًا وسمين جدًا وضحوك يرتدي ملابس يطغى عليها اللون الأحمر وبأطراف بيضاء ويغطي وجهه لحية ناصعة البياض.
يُعرف "سانتا كلوز" في قصص الأطفال بأنه يعيش في القطب الشمالي مع زوجته السيدة كلوز، وبعض الأقزام الذين يصنعون له هدايا الميلاد، والأيائل التي تجر له مزلاجته السحرية، ومن خلفها الهدايا ليتم توزيعها على الأولاد أثناء هبوطه من مداخن مدافئ المنازل أو دخوله من النوافذ المفتوحة وشقوق الأبواب الصغيرة.
"فيتو" سألت الأطفال لو قابلتوا بابا نويل هتطلبوا منه أيه؟
آي فون
فال محمد إبراهيم، 12 عاما: "أنا عايز أقابل بابا نويل علشان يجيب لي "أي فون" ولاب توب وموبايل حلو كده، ونفسي السنة الجاية دي تبقى حلوة وسعيدة وكل الناس تبقى فرحانة وميبقاش في مظاهرات ولا ناس تموت".
الزمالك يخسر
وتمني محمود أحمد، 11 عاما، في حالة مقابلته لبابا نويل سيطلب منه أن يصبح لاعب كرة قدم مشهور يتحدث عنه الجميع، مضيفًا:" نفسي أوي إن الزمالك يخسر على طول السنة الجاية".
عايز أنجح
وأضاف مصطفى رشاد، 13 عاما: "كل اللي عايزه من بابا نويل أنه ييجي يحل مكاني في الامتحانات علشان بصراحة الامتحانات بتبقى صعبة وأنا مش عايز أسقط علشان بابا وماما ميزعلوش مني، وكل أمنياتي في السنة الجاية أن ميبقاش فيه ولا مظاهرة ومحدش يموت خالص".
بيانو
وتمنى حسن خالد، 9سنوات، مقابلة بابا نويل كي يطلب منه أن يحضر له بيانو، مضيفًا: "أنا بحب الموسيقى أوي بس مش هقدر أشتري بيانو، ونفسي أوي إني أطلع مهندس علشان مامتي تفتخر بيا ومتقعدش في الشارع تبيع".
ربنا موجود
أما أحمد مجدي، 12 عاما، فقال: "أنا مش عايز أقابل بابا نويل ومش عايز منه حاجة علشان ربنا موجود وأحسن منه، وربنا قادر يصلح لينا الحال، ونعيش في أمان، ومش عايزين حاجة أكتر من كدة، ربنا هو الرازق، ومش بينسى حد".
