ابتلاع الدولة
أرفض فكرة أخونة الدولة لأننى أعلم أن الإخوان ليس لديهم كوادر أو عدد للسيطرة على الدولة وقررت أن استبدلها بحقيقة ظاهرة غائبة وهى حقيقة ابتلاع الدولة وابتلاع الدولة يبدأ بمغازلة المشتاقين والمنافقين والمتأسلمين ليحاربوا دفاعا عن الإخوان وقد أعجبتنى مقولة إن جماعة الإخوان ستحارب حتى آخر سلفى وهذا معناه أن الجماعة لا تلوث يديها بل ستستخدم الآخرين استخدام الكلينكس.
فقد رأينا مجلس الشورى اللى محتاج شورى على طول وهو يسلق قانون الانتخابات ثُمن سوى علشان الريس اللى بقاله أسبوعين مبيتكلمش وبالتالى ده هيبقى خراب بيوت على باسم يوسف ... المهم الريس مكدبش خبر وأعلن عن الدعوة لانتخابات مجلس النواب ناسيا دعوته للحوار .. يا نهار ده القلم السابع اللى وجهه لبلب لجبهة الإنقاذ النهرى عيب قوى يا شيوخ الجبهة لما الشباب يسبقون فكركم ويحذرونكم من قلم جديد ويطلبون منع الحوار من جماعة الابتلاع وهفضل أقولكم إن الشارع حتى تاريخه لم يتلق أى صفعة من الإدارة الفاشية المعصوبة العينين وكل أقلام لبلب كانت على وجهكم الكريم.
تصريح عصام العريان خاص بأن انتخابات مجلس الأمة تستهدف حصول الإخوان على 76% من المقاعد وليه التواضع ده ما تبحبحها شوية وخليها 96% للإخوان و4% لجبهة الضمير علشان يبقى زيتكوا فى ضميركوا.
لم أندهش من اندهاش السلفيين من غدر الإخوان لأن الغبى فقط هو من لا يتعلم من التاريخ وخصوصا لما يكون التاريخ لم يجف قلمه بعد.
أتحدى كل منظمات العالم والتى تضع التصنيف الائتمائى للبلاد أن تصنف الدكتور أيمن نور.
القنوات الدينية التى تساعد الإخوان على ابتلاع الدولة أقول لكم كفاكم تطوعا والله العظيم ما هتاكلو حتى حتة زبدة فى هذا البوفيه المفتوح وهيكون مصيركم زى مصير حزب النور... 3 أرغفة من أم بريزة.
حكومة الدكتور قطونيل هتقعد على قلبنا حتى شهر 7 ولها مهمة أساسية هى نقطتنا وفرستنا وخراب بيوتنا وبالمرة تمكن جماعة الخير فى انتخابات مجلس الأمة من تكملة بلع مصر من غير أى زغطة.
يا ترى أونكل خيرت ناويلنا على إيه يبقى رئيس مجلس شعب ولا رئيس حكومة ولا وزير داخلية ولا التلاتة فى واحد أعتقد إنه هيكون محتاج شوية دم علشان يعرف يبلع بالهنا والشفا.
انزعاج البعض من وجود القتلة أو الممنوعين من أداء الخدمة العسكرية بسبب خطورتهم على الأمن القومى لمصر المبلوعة، أرى أنه انزعاج مبالغ فيه إذا كان من يحكم الآن هو أكبر خطر على أمننا الداخلى والخارجى يا سيدى مجتش على قتلة السادات والسياح وأطفال المدارس خليهم يبلعوا شوية ما طول عمرهم بيقتلوا وبيتسجنوا ومنابهمش إلا المصمصة يعنى هى جت عن قتلة سابقين ما إحنا سايبين القتلة الحاليين فخليكوا فريش لقد أوشكت عملية الابتلاع على الاكتمال.
