من القبة للاتحادية: نار يا حبيبى!!
قصور الرئاسة من الاتحادية إلى القبة، إلى قصر الطاهرة، إلى عابدين، إلى المنتزه ورأس التين، وما يُستجد من قصور.. عليها أن تتأهّب من الآن للحرق والطوب والبهدلة.. حتى قيل إن بعض هذه القصور خوفًا من المظاهرات «عمل نفسه عشّة»، ومع ذلك حاول قصر الاتحادية أن يتَّصل تليفونيًّا بأخيه «قصر القبة»، لكى يحذِّره من البهدلة، ولكن الوقت كان قد فات وجرى ما جرى، لكن المحادثة تمت متأخرة:
> الاتحادية: إيه يا قبة عامل حسابك على الطوب والمولوتوف؟
- القبة: عملنا بوابة حديد.
> الاتحادية: العيال بيكسّروها.. وخلِّى بالك من السور!
- القبة: السورعندى عالى!
> الاتحادية: دول قرود وممكن ينطوا السور، اسألنى أنا!
- القبة: طيب انصحنى وقولِّى أعمل إيه، أنا من كتر الخوف حاسس إنى بقيت عشوائى زى مساكن الدويقة.
> الاتحادية: اجمد أُمَّال، انت قديم وكان لك شنَّة ورنَّة.
- القبة: الناس بيحسدونا.. والقَر شغَّال على ودنه، وإننا قصور وحاجة أُبَّهة.. بصراحة يا اتحادية يا اخويا أنا لما شفت بوابتك محروقة.. وحيطانك جربانة ومولع والطوب حواليك من كل ناحية الدمعة فرّت من عينى وسألت نفسى هى الناس بتعمل فينا كده ليه!
> الاتحادية: عشان إحنا رمز السلطة!
- القبة: أيوه.. لكن الريس بيقعد فى القصر، ولما بتخلص أيامه مهما طالت بييجى غيره.. والقصر بيفضل على حاله، فين فاروق وعبد الناصر والسادات ومبارك، وفين زكى جمعة؟!
> الاتحادية: انت ليك نفس تهزر!
- القبة: من غلبى، طيب إيه رأيك أنا فكَّرت انتحر!
> الاتحادية: يا ساتر يا رب، وتموت كافر دون أمر إزالة!
- القبة: أعمل إيه بس.. تعرف دلوقت باتمنى أبقى مساكن شعبية!
> الاتحادية: برضه كنت هتتبهدل.. ويتخانقوا عليك.. مين يخطفك قبل غيره!
- القبة: إيه رأيك نكلِّم الرئيس مرسى.. ونقولّه يستغل بيته فى التجمع الخامس!
> الاتحادية: اسكت ما هو بيته عامل فيها عيان وهيقع من طوله!!
