«سطوطة الفنجري» تضرب الودع لـ«وزير الصحة» وتكشف عن المستخبي

أبين زين.. وأقول على المستخبي واللي مش معروف.. وأضرب في ودعي.. وتمللي بأدعي.. والمستخبي بأقوله ع المكشوف..

ياوزارة الصحة نفسي أكشف عليك وأشوف.. إيه اللي فيك والعلاج عندك يكون معروف..أحسن كدة صحتك تعبانة بس الخوف.. تقولي لأ.. كل شيء عندي دواه موصوف..وكل واحد بيكشف ع الدكاتره يطوف.. ويقول لكم عندنا نقص الدواء مألوف..وحنعمل إيه وللا إيه من غير علاج مصروف.. ولو اشتكيت للطبيب تلقى الطبيب مكسوف..ويقول أنا حقي مش واخده كما المطلوب.. وعشان أقدم لكم خدمة ده شيء محسوب.. لازم حقوقي تكون كاملة ومش مغلوب..علشان بقى تبقى خدمة بدون قصور وعيوب.. لازم الحكومة تفكر تعدل المقلوب..فقول لنا ياوزير الصحة.
نعمل إيه.. صحة بلدنا في تعب م اللي إحنا عايشين فيه..وأنتم وعدتم كتير ولا وعد يوم ألاقيه.. إلا وطار في السما كل اللي قولتوا عليه..وأنا ثروتي صحتي ومرضي فين أداويه..فيه ناس غلابة.. وفيه حقنة بألف جنيه.. حيجيب منين والنبي ومافيش جنيه في أيديه..فقول بقي للحكومة وعدها توفيه..وتوفر الحقنة للتعبان عشان تشفيه..وأنا قلت كل اللي عندي واللي عايز أحكيه..ومافيش كلام عندي تاني والوطن نبنيه..بصحة الشعب وسلامنا الجميل نهديه..لكل واحد بيخدم بلده ونحييه.