بالفيديو.. سائقو «الميكروباصات» بعد ارتفاع أسعار الوقود: «السيسي جاي علشان يقلعنا هدومنا».. «إزاي الحكومة تزود 70 % وعايزانا نزود 10%».. «حرام إحنا كده هناكل بعض
سادت حالة من الغضب بين السائقين بسبب زيادة أسعار الوقود، وأعرب السائقون عن غضبهم من القرار، مهددين بالإضراب عن العمل.
ورصدت «فيتو» آراء السائقين على خط (رمسيس - الهرم)، وخط (الإسعاف - ميدان لبنان)، وقال أحد السائقين: «كل شيء زاد وليس فقط الوقود.. قطع الغيار زادات في سوق التوفيقية، وغيار الزيت وكاوتش السيارة.. إزاي يطلبوا مننا زيادة فقط 10% على الأجرة، وإزاي هنطبقها بدون تنظيم ومنشور رسمي».
وتساءل سائق آخر: «إزاي الحكومة تزود 70 % وإحنا نزود 10 %؟»، وقال آخر: «كل شيء بيغلي على المواطن وعلينا.. ما إحنا كمان مواطنين وبنشتري حاجات.. هنجيب منين أكل لعيالنا».
وقال سائق ميكروباص بخط (الإسعاف - ميدان لبنان): «70 % زيادة حرام.. مبارك رفع السعر بريزة.. يجي السيسي يرفعها 70 %.. كده إحنا هناكل في بعض».
وقال سائق «ميني باص»: «إحنا لبسنا في الحيط خلاص.. إزاي يرفع الأسعار على الشعب كله ويقول لا زيادة في أسعار السلع الغذائية.. كل شيء مترتب على الآخر، وأنا شايف إن رئيس الوزارة ده لو دخل مدرسة مكنش رفع الأسعار بالشكل ده.. كفاية جهل بقى.. هو السيسي جاي علشان يقلع الشعب المصري هدومه ولا إيه؟!».
وكان المهندس إبراهيم محلب، رئيس مجلس الوزراء، أصدر قرارات حملت أرقام 1058 و1059 و1060، بشأن زيادة أسعار الوقود الجديدة، وجاءت الزيادة كالتالي: زيادة أسعار بنزين 80، 70 قرشا ليصبح 160 قرشا للتر بدلًا من 90 قرشا، و75 قرشا زيادة لبنزين 92 ليصبح 260 قرشا بدلًا من 185 قرشا، و70 قرشا للسولار ليصبح 180 قرشا بدلا من 110 قروش، وبنزين "95" من 585 قرشا إلى 625 قرشا.
