"وكأني".. قصيدة لسامح لطف الله

وكأني
وكأني ورقة مرفرفة من غير جناح
وكأني ريشة فـ الهوا بطول البراح
وكأني نار ماسكة وفي طرف الهشيم
وكأني تحفة أو حمار أو قول غشيم
الفقر ماسك لبتي والنار محوطاني هنا
يابو إسماعيل قول دعوتك
النار هتسمع كلمتك
على قلب كل الغلبانين
برد وسلام
ودا مش كلام
النار يدوب هتفك قيد المحبوسين
تهدي تنام
على صدر كل الشقيانين
ويناموا برضه ويحلموا
بطعم الرغيف
النوم خفيف
من غير وليف
من غير غطا
بلا سفسطة
والفقر آخر مرمطة
ويقولّه قوم يلَّه انتخب
هات الرئيس
علشان هيسمع كلمتك
صبر وأدان
علشان هيحسب خطوتك
جوه الميدان
ينحت في صخر الأرض
ويجيب الأمان
كالديدبان
ويبوس إيديك صبح ومسا
أؤمر يا خال
إديله صوتك وارفعه
من غير سؤال
وكأني شفت اللحظة في عيون البشر