فتاة: المتحرش شخص جبان متسكتيش وخدي حقك
قامت مبادرة "شفت تحرش"، اليوم، بنشر شهادة فتاة تعرضت للتحرش الجنسى، والتزمت المبادرة بعدم نشر بيانات الفتاة حفاظًا على حقها في سرية بياناتها وهويتها.
نص الشهادة:
أنا النهاردة كنت في شارع شغلي في شارع دمشق متفرع من شارع سوريا، وصلت بدرى فقلت أقعد في العربية لحد ما ييجي ميعادي المهم قاعدة بلعب في الموبايل لقيت ولد شكله عادي جدًا وشكله يجيب إنه متعلم حتى بيقرب من العربية.
أنا مكنتش أخدت بالي إلا لما ببص جنبي في الشباك لقيته فقلت أكيد واقف بيعمل حاجة المهم ببص تاني لقيته بيفتح سوستة بنطلونه ومش عايزة أكمل بقية التفاصيل فأنا توترت بس قلت هكمل لعب في الموبايل وهعمل نفسي مش شايفة.
المهم ممشيش قمت بصبت في عينيه علشان يحس إني مش خايفة فقام طالع يجري وعدى الشارع من غير حتى ما يستر نفسه كويس فقام راجع تاني وعامل نفس الحركة فأنا لما شفت إنه جري أول مرة فهمت إنه خواف المهم قمت سايبة الموبايل ومزعقة امشي يا حيوان من هنا فطلع يجري.
المهم إن أي بنت طبيعي تتربك وتتخض بس هو بيبقى خايف أكتر مننا متسكتيش زعقى وافضحيه.
