فتحت محل حلواني علشان أوفر لها النفقة، ننشر نص اعترافات القاضي المتهم بقتل طليقته في أكتوبر
تفاصيل مثيرة كشفتها أوراق قضية اتهام مستشار سابق بقتل طليقته بممشى سياحي بطريق وصلة دهشور بأكتوبر في محافظة الجيزة، رميا بالرصاص، في ظل تصدر القضية مواقع التواصل الاجتماعي.
وفيما يلي ننشر نص أقوال المتهم والتي جاءت كالتالي:
س: ما تفصيلات إقرارك؟
«اللى حصل إني كنت مستشار فى مجلس الدولة واتجوزت (لميس.ي) دى سنة 2011 وخلفت منها ولدين وبنت اللى هما حلا وعندها 13 سنة وأحمد وعنده 11 سنة والأخير اسمه عمر وعنده 9 سنوات وفضلت متجوز لميس حوالى 10 سنين، لحد ما فى سنة 2021 حصل ما بينى وبينها خلافات أسرية وزوجية، والخلافات دى بسبب إنها كانت عاوزة تقلع الحجاب وتلبس لبس خليع، وفضلنا فى المشاكل دى حوالى 7 شهور لحد ما طلقتها فى شهر 7 سنة 2021».
من ساعتها هى فضلت ترفع على قضايا أسرة وتشتكينى فى التفتيش كل شوية بشكاوى كتير كيدية الغرض منها التشهير بسمعتى، والشكاوى دى كلها اتحفظت علشان كيدية، وهى مبطلتش مرازية فيا وفضلت تعملى محاضر سرقة وتزود فى قضايا الأسرة والكلام ده استمر من سنة 2021 لحد سنة 2024 لدرجة إنى أنا اشترتلها شقة دوبلكس فى أكتوبر، وكتبتها باسمها عشان تبطل مرازية فيا، بس هى مبطلتش لدرجة، إنى أنا مبقتش مركز فى الشغل روحت مقدم استقالتى فى مجلس الدولة».
وفتحت محل حلوانى علشان أعرف أوفر لها النفقات اللى هى عمالة تاخدها منى، وبعد كده هى قالتلى إنها متجوزة عرفى من واحد، ورفضت تقولى اسم زوجها، روحت أنا طالب منها إنها تنقل ملكية الشقة الدوبلكس باسم عيالى، وساعتها هى رفضت واستغربت إنها متجوزة وعايشة فى مسكن الزوجية بتاعى فى الهرم فى اللبينى، روحت قولتلها إنتى اتجوزتى، أنا عاوز إما أخد عيالى أو تسيبى شقة الزوجية بتاعتى، لقتها بتقولى أثبت إنى أنا متجوزة، والحوار دا حصل من حوالى شهرين، وأنا من ساعتها عمال أغلى ودمى محروق، ومش عارف أنام، روحت بطلت أدفع لها أى نفقات، لأنه بجوازها دا بيكون ليا الحق إنى مدفعش أى نفقات، لقتها تانى رافعة عليا دعاوى ونفقات وأجر حضانة وأجر مسكن، وكانت عمالة تقولى أنا مش هسيبك فى حالك... خسرت بيتى وخسرت عيالى وخسرت شغلى بسببها».
س: منذ متى نشبت تلك الخلافات تحديدًا؟
ج: الخلافات دى كانت بدايتها أول سنة 2021.
س: وما الذى آلت إليه تلك الخلافات تحديدًا؟
ج: آخر ما زهقت روحت طلقتها فى شهر 7 سنة 2021 زى ما قلت لحضرتك.
س: عقب إنهائك لتلك الزيجة ما هو المسكن الذى كانت تقيم فيه تحديدًا المتوفاة إلى رحمة مولاها آنذاك؟
ج: هى خدت ولادى وفضلت قاعدة فى مسكن الزوجية فى فيصل فى اللبينى، وأنا ساعتها قلت أسيب لها البيت علشان ولادى حرام يتمرمطوا.
س: ومن كان يقيم رفقة المتوفاة إلى رحمة مولاها آنذاك؟
ج: هى فضلت عايشة فى الشقة دى مع عيالى الثلاثة.
س: وهل انتهت تلك الخلافات فيما بينك وبين المتوفاة إلى رحمة مولاها بمجرد إنهائكما لتلك الزيجة؟
ج: لا.
مقتل سيدة علي يد طليقها
البداية كانت بتلقى اللواء هاني شعراوي مدير المباحث الجنائية بمديرية أمن الجيزة إخطارًا من المقدم محمد راغب رئيس مباحث قسم شرطة أكتوبر أول مفاده ورود بلاغ بإطلاق نار وسقوط ضحية بممشى سياحي بطريق وصلة دهشور.
وانتقلت أجهزة الأمن إلى مكان الواقعة للوقوف على ملابسات الحادث وعثر على جثمان سيدة مصابة بطلقات نارية.
وأشارت التحريات الأولية إلى أن السيدة كانت برفقة زوجها العرفي يسيران معا وقت الواقعة وأن المتهم “طليقها” ترصد لها وأطلق أعيرة نارية عليها وتم التحفظ على السلاح المستخدم في الواقعة.