"الفرح لو يتباع" شعر لـ "محمد عاطف عبد المنعم"

أطل شاعر العامية محمد عاطف عبد المنعم علينا، بقصيدة جديدة، بعنوان "الفرح لو يتباع"، تقول كلماتها:

الفرح لو يتباع
تلقى الكل جاع
لأجل يزود رصيده
ضحكة لأهل بيته
بكروت سحب وإيداع
الضحكة بينا ببلاش
فكها ومتحبسهاش
العمر لو يتعاش
فلحظة تلقاه ضاع
بالحزن تصبح عليل
وتكون وياه ذليل
ده مهما طال الليل
الفجر يقوله وداع
طير دا الكون براح
بالرضا قلبك يرتاح
اخاف لبكره تقول
فالهم عمرى راح
ارسم حلم تلقاه
بيلون ليك الحياه
اوعاك يهرب منك
خليك دايما وراه
يللى غاوبين النكد
الهم ليكم سجد
إلا الضحك ابى
تلقاه فالفرح إتوجد
كفكف كفياك
قهقه جواك
طير فسماك
واهرب م القاع
الفرح لو يتباع
تلقى الكل جاع
لجل يزود رصيده
ضحكة لأهل بيته
بكروت سحب وإيداع