نشطاء «الفيس» يسخرون من «إضراب الأمناء».. «هما خدوا تصريح بالتظاهر».. «افصلوهم مش هتقف عليهم».. «دول أمناء الإخوان».. «ديتها 50 جنيه لكل أمين وال
سخر العديد من نشطاء موقع التواصل الاجتماعي "فيس بوك" من دعوات الإضراب التي دعا إليها أمناء الشرطة، احتجاجا على حبس زميلهم، وتعرضه للإهانة، بحسب قولهم، على يد أحد الضباط بمطار القاهرة.
وكتب ناصر سعيد، على حسابه: "الموضوع مش محتاج استنفار من الداخلية، ولا التهديد بالتصعيد ضدهم، ولا محتاج لاجتماعات ومفاوضات، الحكاية أبسط من كده بكتير.. كام واحد من الشعب ينزلوا ويطبقوا 50جنيه في ايد كل أمين شرطة والإضراب هيتفض لوحده".
وقال أسامة حماد: "كل شوية يخترعوا سبب جديد هم مش عارفين طالعين ليه؟ عايزين يعملوا شغب وخلاص شكلهم مريب"، مضيفا: "لسه ما اكتشفتوش أن البلد مفلسه وأمامها طريق طويل فبدل ما تسكتو دلوقتي وتساعدوها تقف تاني، لا إزاي لازم نعمل أي خراب وخلاص.. استنيتو 30 سنه مش قادرين على 3 أو 4 سنين كمان.. لازم نشتغل وننتج قبل ما نحصل على حقوقنا.. يا رب تفهمو".
القانون مفهوش زينب
وعلق محمد أيمن قائلا: "الله يرحمك يا فؤاد المهندس، القانون مفهوش زينب.. ما هو يا إما إحنا دولة قانون أو دولت هانم.. التظاهر بدون إذن ليس حقًا لأمناء الشرطة.. يجب القبض عليهم فورًا وبدون أي لف ودوران وتغطية سياسية قذرة من نوعية بالراحة عليهم دول بيضحوا بحياتهم علشانا.. القانون فوق رأس أي مصري وإلا قولوا على البلد السلام".
افصلوهم.. مش هتقف عليهم
وعلق مجدى يوسف قائلا: "أمناء الشرطة هم سبب الفساد في الداخلية، وهم أس الفساد في البلد.. يا وزير الداخلية توكل الله واضرب ضربتك بفصل هؤلاء المفسدين من الوزارة وطهر الوزارة، وفصل هؤلاء يمكنك من استعادة الأمن والأمان لمصر".
فيما علق محمود يونس: "إعلان صغير في الجرائد والتليفزيون وكل المجلات بفتح الباب للإلتحاق بالعمل كأمين شرطة بوزارة الداخلية مع التنبيه على فصل أي مضرب أو متظاهر أو معتصم من الشرطة فورا فصلا نهائيا وابقوا خلوا زميلكم ينفعكم.. البلد فيها 10 مليون شاب عاطل أي واحد منهم أحسن مليون مرة من أحسن واحد فيكم أنتم، بس النعمة على قلبكم تقيلة وفاكرين إن البلد هتقف عليكم، وإن لم تنجح الشرطة نفتح تطوع في الجيش ونسميه الحرس الوطنى وبناقصكم خالص.. مش كفايه بنعانى من بلاويكم وخلعانكم خلال 28 يناير 2011 حتى الآن".
أمناء الإخوان.. وعودة المحاكمات العسكرية
وقال إيهاب الشيخ: "فجأة كده وفي وقت واحد على مستوى الجمهورية؟!!! دول أمناء الإخوان الإرهابية، عرفتوا مين اللى بيدى الإخوان الارهابيين بيانات الظباط وتحركاتهم عشان يغتالوهم؟ عرفتوا مين اللى بيعذب المحتجزين في الاقسام من قبل 25 يناير لدلوقتي عشان يثير الشعب على الشرطة؟ هما أمناء الإخوان".
فيما علق محمد ناجي قائلا: "أمناء الشرطة هم سبب كراهية الشعب للداخلية، لذلك هم من يتسببون في الثورات والقادم أبشع".
وقال هاني يوسف: "كل ده بسبب إلغاء المحاكمات العسكرية في الداخلية.. رجعوها تانى الكل يمشى زى الجز.... ولابلاش.. يمشى بما يرضى الله".
أشرف ناس في الداخلية
ودافع المهندس شريف عن الأمناء، وأعلن تضامنه مع إضرابهم قائلا: "ادخل أي قسم لتري أحيانا بعضا من السادة الظباط هم من بيدهم السطوة والسلطة ويستعملها أحيانا بغير محلها، ولولا رحمة وتعاطف الأمناء مع الجمهور لكانت كارثة.. وانظر لبعض لجان المرور تجد فردا واحدا ظابط أو إثنين يجلسون بالظل ويحركون الأمناء المساكين لجمع الرخص.. وأحيانا يكتب الظابط الجالس مخالفات بكل تعنت وبلا تفاهم أو اعطاء فرصة والمهم يجمع أموال ويحرر ايصالات - ولولا تعاطف الأمناء مع الجمهور لكانت كارثة.. الغالبية من الأمناء محترمون جدا ومثقفون للغاية ومنتبهون ومخلصون رغم أنهم حاصلون على مؤهل متوسط.. بعض السادة الظباط هم السبب الأول لفساد من فسد من الأمناء والفاسدون منهم أغلبهم مقهورون من بعض حضرات الظباط"
