في الخلَّاط!
* جماعة معاتيه بيت المقدس وجهت إنذارًا لشركة بيبسى كيلا تسمح للداخلية بترحيل الإخوان المقبوض عليهم في سيارات الشركة، على حد زعم الجماعة الإرهابية.. يعنى لو صدَّقنا كلام هؤلاء المخابيل، فعلينا أن نقتنع بأن سيارات البيبسى بعد ما كانت بتحمل صناديق، أصبحت بتشيل أقفاص!
* قرأت إحصائية تؤكد أن الراقصة (صافيناز) تحصُل على 110 آلاف جنيه مُقابل الرقص لمُدة 45 دقيقة، بعدها غاب (عصام الحضرى) عن مباراة وادى دجلة أمام تليفونات بنى سويف، شكله مُعترض علشان بيقعد يرقُص ويترقَّص 90 دقيقة بخمسين ألف جنيه بس!
* (حمدين صباحى) عايز لما يبقى رئيس يحاكم (السيسي).. يا راجل ده إنت لو بقيت رئيس يبقى الشعب كُله يستحق المُحاكمة!
* بمناسبة سباق انتخابات الرئاسة، كُل مؤيدى (خالد على) قرروا المشاركة بفريق كورة في الدوري المُمتاز الموسم المُقبل، ومشغولين حاليًا بالبحث عن أربعة مؤيدين إضافيين لاستكمال العدد القانونى للفريق داخل الملعب!
* الشيخ (ياسر برهامى) قال في فتوى جديدة له: لا يجوز قتل الزوجة وعشيقها لرؤيتهما عاريين قبل رؤية الفُرج في الفُرج.. طيب إنت نفسك في فتواك قُلت إنه عشيقها قبل ما نتأكد من حكاية الفُرج دى يا شيخنا.. ثم إن حكاية عاريين دى لوحدها فعلًا مش كفاية، جايز الراجل ده ترزى ملابس داخلية، وبيعمل مع الست بروفة جديدة للأندر وير مثلًا.. كله جايز عند (برهامى).. كله ماشى!
* انطلقت الخميس الماضى بالقاهرة مسابقة كأس العالم للشيشة، جاتلك لحد عندك يا كابتن (ميدو)، لو كان دوري الكورة راح، كأس الشيشة لسَّة قدامك.. ومضمون!
* عندما بدأت في كتابة هذا المقال، كان عدد المُشاهدين لكليب "حلاوة روح" على youtube قرابة سبعة ملايين، وعلى ما أخلَّص كتابة هايكونوا تخطوا العشرة ملايين، وأثناء قراءة سيادتك للموضوع أتوقع أن يكون العدد قد تخطى أربعين مليونًا.. لا بُد أن يصل الكليب لمُستحقيه!
* لم أفهم أبدًا طريقة صياغة الخبر: (غادة عبد الرازق) تشارك في مؤتمر حاشد لدعم (السيسي) في زفتى.. طيب إزاى؟ دى بمُجرد مُشاركتها لا يُمكن يكون الخبر بالشكل ده، قول في قشطة، في ملبن، مش مُمكن تفضل زفتى زفتى يعنى بعد الزيارة الميمونة دى!
* يوم الجمعة الماضية، فوجئت بأن (حمدين صباحى) لم يُطلق أي تصريحات إعلامية خلال الفترة من الساعة السادسة مساءً وحتى السادسة وثلاث دقائق.. لعل المانع خير.. قلقتنا عليك يا راجل!
* أحدهم قال ساخرًا أو جادًا لا أعلم: (أيمن نور) قاعد في لبنان علشان يعمل عمليات نفخ.. وأرد عليه ساخرًا أو جادًا لا فارق: طيب ما يرجع مصر وهو يتنفخ أكتر!
* إحنا شعب مفترى ودولة مفترية، نازلين هجوم على قطر، وبنتهمها اتهامات سخيفة، وإحنا أصلًا عاملينها مستودع للإرهابيين الهاربين وبكده نبقى حاطين كل زبالتنا هناك!
