عزيزى المُغفل.. فاكر؟!
عزيزى المُغفل.. فاكر (صفوت حجازى) لما وقف في اعتصام رابعة، وقال بأعلى صوته: النهاردة الجمعة، بكرة السبت هايحصل حاجة، ويوم الحَد الرئيس (محمد مرسي) هايبقى معانا هنا.. عزيزى المُغفل، إنت كُنت من اللى صفقوا، وللا اللى هللوا، واللا اللى كبروا، واللا اللى طلعوا شالوا (صفوت حجازى) فوق رأسهم، وطافوا به الميدان والاعتصام؟ لاحظ إنه عدى ييجى سنة، وعدى ييجى خمسين جُمعة وزيهم سبت وكمان بعددهم حَد، ومحصلشى الحاجة اللى إنت صدَّقتها وبصمت عليها، و(مرسي) مرجعشى للاعتصام لحد دلوقتى، و(حجازى) نفسه هرب من هناك جرى على ليبيا، وهو بيقول وإنت بتقول وراه: ع القُدس رايحين شُهداء بالملايين، أتاريه عمل السكسوكة، ومسك في الساندوتش وإزازة الكابى بإيديه وسنانه، وأول ما اتكلم في التحقيقات قال إنه مش إخوان!
عزيزى المُغفل.. فاكر (محمد البلتاجى) لما وقف في اعتصام رابعة برضو، وقال إن اللى بيحصل في سينا هاينتهى لما (السيسي) يتراجع عن الانقلاب؟ وبعدين إنت نفسك رجعت قولت إنه ميقصدشى الإرهاب وقتل الجنود؟ طيب هو كان فيه حاجة تانية بتحصل في سينا ومُمكن تهدد (السيسي) غير كدة؟ وإنت نفسك لسَّة مصدق إن (السيسي) هو اللى بيقتل العساكر بتوعه، و(محمد إبراهيم) هو اللى بيقتل الضباط بتوعه، وبيفجر مديريات الأمن والأتوبيسات، وبيفجر الموكب بتاع نفسه من ستة لتسعة لما يبقى فاضى كمان!
عزيزى المُغفل.. فاكر لما روحت تقدم نفسك شهيدا، علشان كُلكم كنتم مشاريع شهادة في (محمد محمود) وأحداث العباسية ووزارة الدفاع، بناءً على صرخة أمير الأمريكيين (حازم صلاح أبو إسماعيل)، وهو ضحك عليك وفضل راقد تحت السرير ومراحش معاك، ومع ذلك فضلت تصدقه حتى لما قال إنه أمه مش أمريكانية، ولما قال إنه هايعمل ثورة إسلامية لو (مرسي) اتشال، ومع ذلك طلعت أمريكانية، ومعملشى الثورة، وأهو حاطط إيده على خده في السجن أهو، وطلعت إنت هندى؟!
عزيزى المُغفل.. فاكر كام مرَّة انقسم فيها الجيش المصرى من بعد ثورة يونيو؟ فاكر إنت فرحت للخبر دة وشيرته عندك ع الفيس بوك كام مرَّة؟ فاكر (أحمد وصفى) والجيش التانى بالذات انشقوا كام مرَّة؟ فاكر اللوا (العصار) انشق كام مرَّة؟ الواحد من وقتها وهو حاسس إن الجيش المصرى ده بيقوم الصبح يعمل طابور التمام، ويفطروا، وبعدين يعملوا انشقاق الظهر، وواحد تانى بعد العصر علشان يحافظوا على لياقتهم البدنية في الانشقاقات.. وإنت كُنت لسَّة بتصدق، وتلاقيك لسَّة مصدق.. داهية تخيب الخايب!
عزيزى المُغفل.. فاكر (السيسي) اتقتل ومات كام مرَّة من ساعة ثورة يونيو؟ الراجل دة حقيقى عجيب، شوف إنت نفسك حلفت كام مرَّة وإنت بتدافع عن اللى سايقينك سواء الجزيرة أو موقع الحُرية والعدالة، وبتحلف ميت يمين إن اللقطة بتؤكد إن الراجل ده ميت، والفيديوهات قديمة، والهدوم مش عارف فيها إيه، ومع ذلك كُل مرَّة الراجل كان بيموت، كان ياعينى بيرجع تانى، وإنت لسَّة مصدق إنه مات كتير قبل كدة!
عزيزى المُغفل.. شوفت الصورة اللى نزلتها بنت (مرسي) وقالت إنه مش أبوها؟ طبعًا إنت صدقتها، وكذبت عينيك والمرحوم مُخك.. عادى، طيب إحنا محتاجين فيصل حاسم في الموضوع ده، هل هو فعلًا أبوها واللا واحد تانى؟ أرجوك لا تسل إخواتها الصبيان اللى بيزوروه في السجن، ولا تسل فرقة (العوا) اللى بيقابلوه في المُحاكمات، وطبعًا أنت لا تثق في القضاء ولا الداخلية، مُمكن تسأل (شيمون بيريز) رئيس دولة إسرائيل العظيمة، وصديقه الأنتيم، أكيد محدش هايعرفه زيه، أصلهم عِشرة عُمر، ما إنت عارف!
alwaraky_writer@yahoo.com
