"نورك فين يا كهربا" قصيدة لـ "محمد عاطف عبد المنعم"

كتب شاعر العامية محمد عبد المنعم عاطف قصيدة جديدة بعنوان "نورك فين يا كهربا" يقول فيها:

نورك فين يا كهربا
أحوالك ليه متقلبا
من كتر فصل سكاكينك
قتلوا في قلبك الذبذبا
ضيك جوا القناديل
راح ف عتمة ليل
ومصر عروسة النيل
شابت في عز الصبا
فصلوا نبض الحياه
وحلم بكره تااه
مكتومة صوت الااه
لا فيه حنيا ولا طبطبا
مفصولة ويجرى العداد
وفاتورة عايزة السداد
والقلب نبضه زاد
والعقل صابه الغبا
أزمات ومفيش حلول
والكل صبح مشلول
شعبك يا مصر بيسأل
فخرابها مين مسئول
سوء في التخطيط
والعجز في التوليد
وزيادة استهلاك
ولا فيه وعى وترشيد
يا أم التاريخ والحضارة
يا شعاع النور والمنارة
آخرتها لمبة جاز ؟
وكشافات بالحجارة !!
بنولد كهربا م السد
والميه عنه هتنسد
أخاف ييجى بكرة
ونلطم كلنا عالخد
يا أم الدنيا إيه الحكاية؟
يا نجمة ليلى وقمرايا
بدور عليكى ف سمايا
وانتى مسروقه متهربا
نورك فين يا كهربا