المعلم هريدي: السيديهات زي البطاطس والقوطة يا عم مرتضى!
اللي ما يعرفوش مرتضى منصور أن للسيديهات عمر افتراضي زي البطاطس والقوطة والملوخية.. بعدها بتبوظ على طول.. هكذا قال المعلم هريدي لمحرر الوكالة.. وأضاف: كل شوية يطلع مرتضى ومعاه كام شوال سيديهات بيهدد الناس بيهم..ايشي فضايح جنسية وايشي مستندات تدين عدد من الحرامية الكبار..الناس دي لهفت البلد وشفطت فلوسنا..
وبصراحة مرتضى داخل دماغي.. مش عشان السيديهات..لأ..عشان راجل صريح ودوغري وبيقول للأعور أنت أعور في عينه السليمة..راجل اللي ف قلبه على لسانه.. ما بيخافش غير من ربنا.. طبعا هوه مختلف عن الناس التانية اللي بتعمل حساب لفلان ولعلان ولترتان.. وبيخاف م الدولة دي ويعمل حساب لكشك السجاير والحاجة الساقعة اللي على الخليج اللي بتبيع فيه موزة أي حاجة..
ومرتضي لا بيعمل حساب لا للدب ولا الواد الأسود بتاع الكنتاكي.. بيعمل حساب للشعب المصري بس.. والكلمة اللي قالها ودخلت دماغي:اللي بيخاف م الناس يبقي ما بيخافش من ربنا..الله ينور عليك يا مرتضى.. بس بطل الكلام عن السيديهات وربنا هيكرمك!
