"وهم التعيين" قصيدة عامية لـ "محمد عاطف عبد المنعم "

أطل علينا شاعر العامية، محمد عاطف عبد المنعم، بقصيدته "وهم التعيين"، والتي عبر فيها عن مشكلات البطالة، والروتين، والفساد، التي يعانى منها المجتمع، قائلا:

قريت إعلان عن التعيين
نزلت منى دموع العين
جريت وشايل شهاداتى
فوجئت بطوابير بالملايين
أنا قُلت مفيش مستحيل
هقف حتى لآخر الليل
وكان الشىء الجميل
قفلوا الباب الساعة 2
حسيت إنى في السخرة
ياولاد الإيه يا كفرة
جاى ليكم تانى بكرة
ومشيت مهموم وحزين
رجعت تانى يوم
عنيا مشافت نوم
غرقان فطابور وبعوم
ووصلت لحد الموظفين
قالولى هات الفيش
رديت أنا معاييش
غير موقفى م الجيش
وبجد جدا متشكرين
مصاريف كدا بتزيد
غير مصاريف البريد
وكأنه اليوم دا عيد
للواسطة والمرتشين
وآدى الوظيفة راحت
اختاروا بس واحد
وريحة الكوسة فاحت
وسبكوها الطباخين
ده حكومة بتلم فلوس
بالجزم علينا بتدوس
وكأننا نمل وسوس
وانكشف وهم التعيين
بيتاجروا بطموح الشباب
سقونا الذل وشربنا العذاب
ومهما هربوا جاى الحساب
في الدنيا وفى يوم الدين