"الشحات والبهوات" قصيدة لمحمد عاطف عبد المنعم
كتب محمد عاطف عبد المنعم قصيدة تحمل عنوان "الشحات والبهوات" يقول فيها:
مش كل من مد أيده شحات
وعمر الفلوس ما تعمل بهوات
ناس بتجرى ورا أكل عيشها
وناس بتجرى ورا الشهوات
ناس بتشحت الكلمة
وناس بتشحت البسمة
وناس بتشحت اللقمة
وناس بتشحت حاجات
لو أنت عامل بيه
شوف أصلك كان إيه
وكل اللي أنت فيه
سهل يضيع فـ لحظات
ناس بتشحت الحب
عشان يعيش القلب
ملوش علاج ولا طب
ودي أصعب حالات
يللي بفلوسك بتفتري
اشحن صحتك واشتري
ووقف عمرك لو جرى
بفلوسك ورينا القدرات
شحات وجيبه مليان
مهنة وفيها كسبان
وفقير عفيف غلبان
محروم من الصدقات
جمع المال إدمان
شهوة زينة وأمان
شهادة للبيه وضمان
هتبقى معاه لو مات
راسم عاهه ف إشاره
الصحة فيك خساره
ذل إهانة ومرارة
سليم ولا أي عاهات
لو عندك يا بيه بواقي
غيرك يا بيه مش لاقي
وزع فالخير هتلاقي
الحسنة عشر حسنات
شحات محتاج للبيه
والبيه أصله شحات
شحات مهما تديه
عايش بردو شحات
مش كل من مد أيده شحات
وعمر الفلوس ما تعمل بهوات
ناس بتجري ورا أكل عيشها
وناس بتجري ورا الشهوات
