المعلم هريدي:هاضرب الدكاترة بالشوم ولن أترشح للانتخابات الرئاسية!
في الصباح الباكر ذهب المعلم هريدي إلى وكالته بسوق العبور، فوجد 3 آلاف من عماله ينتظرونه وهم يرفعون لافتات مكتوب عليها: هريدي رئيسي.. ياهريدي يا إما بلاش واحد غيره مايلزمناش.. يا رئاسة فينك فينك هريدي بينا وبينك.. والشعب يريد هريدي الرئيس..
نزل المعلم هريدي من سيارته وأخذ يحيي عماله بحرارة وقال: يا جماعة الرئاسة دي مش سهلة.. مصر بتغرق وعايزين نشيلها كلنا مع بعض.. المهم نشتغل وننتج.. كل واحد في مكانه.. واتأكدوا أني بحبكم كلكم.. وبحب الشعب المصري كله.. لكن أنا ما انفعش أبقي رئيس.. ليه بقى.. لأني راجل صريح ودوغري وباقول للأعور إنه أعور ف عينه.. يعني الدكاترة لما يعملوا إضراب والغلابة يموتوا ف المستشفيات وهما بيطالبوا بفلوس زيادة هلمهم كلهم وهاتك ياضرب بالشوم.. ويا يدخلوا يشوفوا شغلهم ويعالجوا الغلابة يا إما ارفدهم وأجيب دكاترة هنود وباكستانيين وخليهم يقعدوا ف بيوتهم يقشروا بصل.. وزيهم زي العمال في المصانع..
وهنا صفق له العمال طويلا..
يا جماعة أنا راجل صريح ودوغري.. ما انفعش للرئاسة..لأن دي عايزة واحد يعمل حساب وجبر وهندسة وتفاضل وتكامل وكمان ديناميكا واستاتيكا.. وانتوا عارفين أنا مش شاطر ف الرياضة.. ياللا يارجالة كل واحد يشوف شغله ورزقي ورزقكم على الله.
