"قصة خداع" قصيدة للشاعر محمد عاطف عبد المنعم
الطيبة مش بالشكل
شرير بأجمل وش
الصحة مش بالأكل
أمراض بسبب الكرش
بني آدم بنى قصور
وعدى بيها بحور
طار بيها كالعصفور
وأخره ضعيف وهش
في الدنيا بنتخدع
براها غير جواها
في حياتنا بنتوجع
غنوتنا هيا الأهااا
متقولش أنك فاهمها
كام مرة ليها بكيت
بلاش تدافع عنها
أنا فوقت ليها صحيت
ليه لما يشتد فرحك
تلقى عينك تدمع
ليه لما يشتد جرحك
ينكتم صوتك ما يطلع
جرب تسرح وتفرح
وانسى حالك كام يوم
هتلاقى جرح بيدبح
وكترت عليك الهموم
ليه لما الفجر يطلع
بيجي بعده الظلام
ليه لما تاكل وتشبع
تتعب لو بعده تنام
مليت منك يا الدنيا
قولت أنام وأرتاح
صحيت على حاجة تانية
لقيت العمر راح
