" كتب القلم ممنوع " قصيدة لـ " محمد عاطف عبد المنعم "

وجه الشاعر محمد عاطف عبد المنعم، رسالة إلى كل رصاصات الغدر والخيانة التي تنال من أبناء الشعب المصرى، قائلا: " بكرة يوم الحساب.. هييجى حق الشباب " من خلال قصيدته " كتب القلم ممنوع "..

كتب القلم ممنوع
شعرك مهوش مسموع
دمك يا مصر بينزف
شعبك بيصرخ جوع
شعبك شبع أوجاع
أكل شبع أو جاع
الحلم منه اهو ضاع
وغرقان في الدموع
كتب القلم مش كاتب
كتب القلم أنا غاضب
دا الكل سادد ودانه
أشكى لمين وأعاتب
اكتب يا قلم وبلاش خوف
اكتب قول للجيل الجاى
اكتب املا الدنيا حروف
اعزف ألحان زى الناى
اهمس ويا الليل
اصرخ جوا الزحام
نور كما القنديل
اكشف غطا الظلام
اعدلها لو هتميل
سمعنا أحلى الكلام
كتب القلم هيعوود
بزهرة شباب وورد
واقفين لينا عالحدود
رصاص غدر وخيانة
وبرود بأيدين برود
وبكرة يوم الحساب
هييجى حق الشباب
أصعب عقاب وعذاب
دا رب الكون موجود
قلوب زى الحديد
في الأمن والتجنيد
ولادك وقت الخطر
مشروع بطل شهيد
زرعوا الخيانة بينا
كفروا ليه في دينا
قوينا يارب وعينا
واجعل عقابك شديد
لو أنت فيها زاهد
وشايف الدنيا تاهت
سايب ليه عدوك
وف أخوك بتجاهد
حرفت ليه الطريق
عدوك بقى الصديق
قتلت ليه البرىء
ربك شايف وشاهد
يا مصر يا أم الحضارة
بنيتى أحلى القصور
حضارتك بقت حجارة
وعشنا جوا الجحور
يامصر يا أم التاريخ
هزمتى كل الجيوش
الحرب مش صواريخ
دا ليها مليون وشوش