ليه؟

يا بلد ظلام الليل كاسى عقول سكانك رضيتى ليه بالذل يكون حليب أولادك وعاوزة ليه الجهل يكون مصير أحفادك، بتطاطى ليه يا بلد بنظرة من سيافك وحطه ليه الهم على كتف أحبابك..

خايفة ليه الشمس تفوت على دارك وقفلة ليه شبابيكك وحابسة جوه شبابك، بتقولى إن النور كاشف لأسرارك وفى الحقيقة خايفة ليفضح أفكارك تموت وتحى بلاد وأنتى على حالك موازينك اختلت وعيالك اتزلت وكل ما يحبوكى تسودى حياتهم وتكفنى أحلامهم بسوء ظنونك..

مخونة الثوار وشايفة الثورة عار وكل إيد ممدودة بالخير بتتخون ويتشكك في نزاهتها،، وطبعا الأشرار في ربعك انتى أخيار ومحصنين بالحب يمدوا أيدهم بشر تمدى إيدك بخير وتقولى مش قاصدين وحتى لو قاصدين بتخلقى أعذار وتقتلى أفكار وتطحنى الثوار وتقضى على الحاضر عشان عايشة في ماضيكى..

بتجددى سجانك وتألهى حكامك وتخلقى فرعون وتصنعيه تمثال وتعبديه لسنين وعاوزة كل ولادك يكونوا ليه راكعين ولو فكروا لحظة يهدوا خرفاتك ويكسروا التمثال تكسرى أيديهم وتمثلى بيهم وترممى التمثال أو تبنى غيره كمان..

دى صناعة الفرعون ليكى الريادة فيها وبتفخرى بيها، والحلم جواى دايما بيبقى كابوس،، يا بلد ظلام الليل كاسى عقول سكانك اصحى من أحلامك وحررى نفسك من سحر فرعونك وظلم سجانك..