أول مرة تحرش.. هاشتاج يروي مآسي الفتيات مع التحرش.. ليلى: المحفظ هرب بالتبرعات ومحدش عرف أنه متحرش غيري.. مها: منظم رحلات يمسك البنات.. كوين: ما فهمتش التحرش إلا بعد 10 سنوات من وقوعه
أثارت واقعة التحرش بطالبة كلية الحقوق بجامعة القاهرة، جدلا واسعا على مواقع التواصل الاجتماعي، خاصة مع تداول فيديو لكل من الإعلامي تامر أمين يتهم فيه الفتاة بتحمل مسئولية محاولة التحرش بارتدائها ملابس فاضحة والسير بطريقة غير ملائمة داخل حرم الجامعة، وفيديو لرئيس الجامعة د.جابر نصار يحمل الفتاة جزء من المسئولية بسبب ملابسها، وهو ما دفع النشطاء لتدشين هاشتاج #أول_مرة_تحرش_كان_عمري للتأكيد على أن المتحرش لا يهمه ملابس الفتاة، أو طريقتها ليتم التحرش بها.
تروي ليلي تجربتها عن أول مرة تحرش قائلة " #أول_محاولة_تحرش_كان_عمري ١٠ رحت للمسجد مع قريبتي وكان الشيخ اللي بيحفظها عينه هتطلع عليا وفضل يسألني بتلعبي باليه وخدني على حجرة" وتابعت ليلى في تدوينة أخرى "والمفاجأة بقى إن بعد كام سنة عرفوا إن الشيخ دا حرامي وهرب بفلوس الجامع والصدقات.. بس محدش يعرف إنه كان متحرش!".
أما هيرمووس فكتبت " #أول_محاولة_تحرش_كان_عمري 8 سنين. وكان التحرش من ابن عم لي. تحدثت عما حدث تماما وبالتفصيل لوالدى، ولم يلق إلا لذلك".
فيما كتبت مها مؤمن "#أول_محاولة_تحرش_كان_عمري 9 سنوات كنت في معرض في المدرسة ومنظم الدخول كان بيمسك كل البنات من صدرهم 9 سنين واحنا أطفال كنا بنحاول نحوش إيده".
وكتبت كوين دي "#أول_محاولة_تحرش_كان_عمري ١١سنة تقريبًا وكنت في معرض الكتاب مع أمى.. والله العظيم مفهمت اللى حصل لى اللى بعدها بنحو ١٠ سنين!!"
فيما كتبت سلمى ناجي "#أول_محاولة_تحرش_كان_لأختي عندما حاولت أن تحرر محضر لاتنين في المترو من سنين والضابط مارضيش! قالها هنجيب حقك من غير محضر" وأضافت سلمي في تدوينة أخرى "#أول_محاولة_تحرش_كان_عمري مش فاكرة، لكن فاكرة أني كنت راجعة البيت من محطة مترو المعادي لازم أتفادى مدرسة ابتدائي بنين عشان سفلة".
أما إيمان المصري فكتبت في تدوينتين منفصلتين "#أول_محاولة_تحرش_كان_عمري 9 سنين، كنت بحب الرسم وجدي كان بيسيبني على الكورنيش جمب ماسبيرو ويرجع يأخدني بعد كام ساعة، شخص قعد جمبي وضايقني وقومت وعديت الناحية التانية من الشارع وفضلت مستنية جدي وأنا خايفة ومش قادرة أبعد، إحساس بالقهر".
الهاشتاج لاقي صدى كبير، حيث كتب وليد زكي "#أول_محاولة_تحرش_كان_عمري هاشتاج مرعب للغاية.. ويخليك تكره البلد باللي فيها... ملعون أبو كده" فيما كتب خالد عرفة "على تويتر فيه #أول_محاولة_تحرش_كان_عمري الهاشتاج ده لو قريت قصص البنات.. مش هايجيلك نوم!!"
أما إسراء يحي فكتبت "#أول_محاولة_تحرش_كان_عمري الهاشتاج دة يبين أد إيه عندنا عفن فكري وما أكثر الحيوانات اللي بيفكروا بنصهم التحتانى.. معظم حالات التحرش اللى حصلت للبنات كانت بين 4 إلى 12 سنة..!!؟؟" فيما كتب شريف "بعد ماقريت التدوينات على الهاشتاج #أول_محاولة_تحرش_كان_عمري: خايف انزل بنتي اللي عندها 3 سنين الشارع".
