نشطاء «تويتر» يردون على «عنان» بـ «موجة تعليقات ساخرة».. فتحي: مفكرتناش بعبد الناصر خالص.. علاء: أمال لو كنت هتترشح كنت عملت إيه؟.. حازم: بكري الراجل الواقف ورا عنان.. در

دشن نشطاء مواقع التواصل الاجتماعي هاشتاج: كوميديا انسحاب عنان، ردا على قرار الفريق الانسحاب من سباق الانتخابات الرئاسية المقبل، والذي قوبل بسخرية وتهكم من خلال تدوينات متنوعة أعقبت المؤتمر الصحفي الذي شهد إعلان القرار السابق.

قال الكاتب "محمد فتحي":" الجنرال البائس يتمسك بالظهور وسط فوضى عارمة، ومصطفى بكري يصرخ في الناس: هنضطر نمشي ولسان حاله يقول: أي خدمة..خليته ينسحب أهه".

وتابع:" لازم نعترف إن الحتة اللي سامي عنان قال فيها إنني اتخذت قرارًا.. وبعدين سكت شوية يبص للناس فلقاهم بيقزقزوا لب.. مافكرتناش خالص بعبد الناصر".

وقال الناشط السياسي حازم عبد العظيم: "هو مصطفى بكرى بقى الراجل اللي واقف ورا سامي عنان؟!".

وكتب "على":" مصطفى بكري لسامي عنان مش هتترشح وبالعافية".

وقال "علاء":" يعنى عامل مؤتمر ومكلف نفسك فراشة وإضاءة وده كله علشان تقول مش حتترشح؟ أمال لو حتترشح كنت عملت إيه ؟ جبت دي جي".

وأضاف:" يا خسارة التسريبات بتاعتك اللى كانت بتتجهز لك يا عنان".

وعلق "مدحت":" هو أصلًا قال إنه هيترشح علشان ينسحب... بكرى مان عمل شغل جامد".

وقال "جمال": " دا الراجل كانت هتجيلوا الحصبة من كتر ما كان عمال يصغر في سنه".

وتابع:" يعنى كنت هتموت هدر يا سامى أول امبارح، ومكنش في نيتك تبقى رئيس يا حرام".

بينما كتب "محمد":" فيه 3 من حملة عنان بيسقفوا بعد ما قال مش هيترشح ههههههههههههههه".

وأضاف "الباز":" في الآخر حيطلع مصطفى بكرى هو الراجل اللى ورا عمر سليمان".

وعلق "أحمد": " السؤال الكوميدي هنا يطرح نفسه هو عنان كان أعلن إمتى أنه اترشح علشان يعمل مؤتمر صحفي يعلن انسحابه؟".

وأضاف "على":" علشان تعرفوا إن سامي عنان ابن مصر وابن نيلها وبياكل من ترابها، الكهرباء قطعت عليه في المؤتمر بتاعه".

وكتب "أحمد":" في مصر بس يعلن الشخص انسحابه من أي انتخابات قبل حتى ما يفتح باب الترشح".

وتابع "درويش": "شيل يا ابنى أفيش سامى عنان الخاين العميل الإخوانى، وانزل بسامى عنان الوطنى الشريف".

وعلق "فتح الله":" عنان انسحب من انتخابات كان عارف إنه لو نزلها، مش هياخد حتى أصوات الناس اللي حضروا مؤتمره النهاردة".