بالفيديو.. «المعزول» يستفسر من «العوا» عن ترشح «السيسي» للرئاسة

أذاع برنامج "الحياة اليوم" على قناة الحياة، الذي يقدمه الإعلامي عمرو عبد الحميد، تسريبا لمكالمة هاتفية بين الرئيس المعزول محمد مرسي، ومحاميه محمد سليم العوا، والذي انفردت به الزميلة "الوطن".

وجاء نص المكالمة:
مرسي: قول لي على أخبار الدنيا، ملخص سريع كدة..

العوا: "الدنيا كويسة، لا بأس بها الناس كلها مشغولة بالانتخابات الجديدة الصور ملت الشوارع والمظاهرات موجودة في كل المدن وكل القرى بالليل كل يوم والمصادمات ما بتتوقفش لكن ده كله ملوش نتيجة نحن في عمل غير منتج العمل المنتج حاجة تانية، العمل المنتج لازم الناس تقعد وتتكلم وتصل إلى حل بدون الوصول إلى حل يا دكتور محمد مافيش فايدة مفيش فايدة ويعني"

مرسي: "مفيش فايدة من ناحيتين" ويجيب العوا "من نحيتين طبعا.. مش كدة والا إيه".

العوا: "أيوة مانا بقول مافيش فايدة من الناحيتين مافيش فايدة بالنسبة لمصر الحقيقة أنا مش هممني مين ولا مين أنا لا هاممني إخوان ولا المشير عبدالفتاح السيسي دلوقتى مش هاممني اللى هاممنى البلد البلد بتضيع ".

مرسي: "هو رقى نفسه لمشير ليه دلوقتى"

العوا: لا ده اللى رقاه المستشار عدلى منصور"

مرسي: "لأ بغض النظر"

العوا: "علشان يبقى خد آخر حاجة في العسكرية"

مرسي: علشان لما يبقى رئيس يبقى مافيش حد أقدم منه وللا علشان مايبقاش أنا اللى عملته.

العوا: "وماتبقاش انت اللى عملته ويبقى قائد أعلى بجد وبحق وحقيقي دي كلها اعتبارات مهمة يعني"

مرسي: "وهو عايز يبقى رئيس فعلا"؟

العوا: "هيبقى إن شاء الله"

مرسي: هيسيب الجيش؟

العوا: نعم

مرسي: "مش خايف من الانقلاب؟"

العوا: "لا ماخلاص ما هو هيبقى القائد الأعلى هو حسني مبارك ساب الجيش وللا الرئيس السادات الله يرحمه ساب الجيش".

مرسي: "هيعملوا عليه انقلاب؟"

العوا: لا

مرسي: "ما هو اللى بينقلب بينقلب عليه انت مش فاكر؟.. فيه نقطة أنا عايز حضرتك تتكلم فيها مش عارف رئيس المحكمة وللا مين أنا محتاج فلوس في الأمانات فدلوقتى ماعنديش زيارات ولا محامين ولا إيه"

العوا: "الفلوس دى لازم تتدفع خلال الزيارات ولا إيه؟"

المعزول: "أنا معرفش يعني دلوقتى أنا محتاج يبقى في حسابى فلوس علشان أعرف أعيش دلوقتى السجن بيقول مجاش أي حاجة"

العوا: "طب دلوقتى هسأل المحامين مين اللى عمل كده"

مرسي: أسامة.. أسامة مش ابني

العوا: أسامة الحلو موجود

مرسي: أسامة الحلو ده كان دخل النهارده

العوا: "مش عارف دخل ولا لأ بس يعنى نسأل"

مرسي: "ماحنا عايزين نشوفلها حل ألا إذا انتوا تجيبوا فلوس قدام القاضي وتدوها لحد من الضباط يعنى قصدى نعمل إجراء وماينفعش فلوسي اللى في الأمانات تخلص لأن إحنا لينا مصاريف وخد بالك ومصلحة السجون لها"

العوا: "أيوه طبعا لها قواعد ونظم وأسس مش هيصرفوا على محبوس احتياطي على حسابهم"

مرسي: "مش هيصرفوا علينا يعني"

العوا: "طبعا لا دي نخلصها دلوقتى إن شاء الله يا إما مع الدايرة يا مع مصلحة السجون نفسها نبعت حد".