«الاستفتاء ريحته وحشه».. «ماهر»: «دستور 2014» لا يختلف عن «تعديلات 2005».. اتهامات الخيانة والعمالة والتخريب لم تختلف.. حرام الفلوس اللي ضاعت في التصويت.. مصر ل

«لأن اللي بيحصل ملوش علاقة بالاستفتاء من قريب أو من بعيد، اللي بيحصل دلوقتي بالظبط زي استفتاء 2005، لما كل أجهزة الدولة وقتها حشدت بـ(نعم)، وكل رجال الأعمال علقوا يفط (نعم لمبارك نعم للدستور)، وقتها برضه كانوا بيقولوا إن اللي هيصوت بـ(لا) هو خاين وعميل وعايز خراب البلد زي ما بيقولوا دلوقتي بالظبط».

«مؤسس 6 إبريل» أضاف:

«مفيش فرق كبير بين التدليس والتزوير اللي حصل في استفتاء 2005 وبين استفتاء 2014، نفس الأسلوب والخطاب والانتهاكات والفاشية والكذب، ربما يكون دستور 2014 أفضل قليلا من دستور 2012، وأفضل بالطبع من دستور 1971، ولكن فيه الكثير من السم في العسل، خصوصًا سلطات الرئيس التي عادت بنا للنظام الرئاسي الواضح.. وطبعا مواد المحاكمات العسكرية.. ومواد العسكر عموما وسيطرتهم على الدولة حتى لو السيسي مش رئيسي».

وذكر «ماهر»: 

«بس ليه المصاريف دي كلها طالما الموضوع كله تمثيل في تمثيل؟!!!.. مش حرام الفلوس اللي بتضيع في الاستفتاء دي؟!!!.. مش الناس الغلابة أحوج لها؟!!.. بذخ في الدعاية بـ(نعم) واعتقال كل من يعترض أو يقول (لا).. منتهى الديمقراطية.. وكمان استبعاد أي جمعيات ممكن تكشف الانتهاكات والتزوير، وفقط تم الإبقاء على الجمعيات والمؤسسات اللي أعلنت موقفها إنها مؤيدة لـ(نعم)!!!.. واللي بيفكر يصوت بـ (لا) بتقولوا عليه خاين وعميل ومخرب!!.. عاملين استفتاء ليه بس؟!!.. ليه المصاريف دي كلها؟! مش حرام؟!».

وواصل ماهر حديثه، قائلا: 

«أنا سامع حد دلوقتي خارج يقول أحمد ماهر بيتكلم ليه!!.. ده كان في تأسيسية مرسي.. لا يا أسطى.. إنت مش بتقرأ كويس أو مش متابع الأخبار أو بتستهبل، عمرو موسى رئيس لجنة الخمسين كان برضه في تأسيسية مرسي، وكذلك كتير آخرين زي جابر نصار، وحيد عبد المجيد، عبد الجليل مصطفى.. وأنا انسحبت في نفس اليوم، بل إن فيه من لم ينسحب من تأسيسية مرسي وصوت بنعم لدستور الإخوان وبقى برضه في الـ50 ممثلي النقابات والأزهر والجيش".

وقال:

"بغض النظر عن المزايدات الرخيصة دي.. أنا عن نفسي انسحبت من التأسيسية وعارضت دستور (مرسي) وحشدت الشارع للتصويت بـ(لا).. وكان اعتراضا على نفس المواد الكارثية الموجودة في دستور 2014، وفي 2012 أنا قدرت أوزع 5 ملايين منشور ضد دستور الإخوان.. ونزلنا مظاهرات في كل مكان ضد الدستور.. هل حد دلوقتي يقدر يعمل كده؟!!».

وشدد قيادي «6 إبريل» المسجون حاليًا: 

«أي حد دلوقتي عنده أي اعتراض على الدستور هيبقى خاين وعميل وعايز خراب مصر زي ما بتقول وسائل إعلامكم.. الإخوان أداروا مصر بمنتهى الغباء والانتهازية، لكن النظام العسكري الفلولي الجديد أكثر غباء وفشلا وانتهازية، وأكثر قمعا وديكتاتورية واستبدادا وكذبا وسفالة.. بتعتقلوا اللي عايز يقول (لأ)، ومحدش بيطلع في الإعلام يدافع عن وجهة نظره، واللي هيراقب مؤيدين فقط، وحتى القاضي اللي هيشرف برضه مؤيد فقط!!! ده اسمه تزوير على فكرة».

وتابع: 

«انزل وقول نعم.. وبس.. وبالتالي فكلمة (استفساء) هي التوصيف الطبيعي للي بيحصل لا علاقة لما يحدث بأي استفتاء أو دستور أو ديمقراطية.. (الاستفساء) بتاعكم ريحته وحشة ومفضوح، وكده عمرنا ما هنستقر ولا البلد هتهدى.. مش بتستخدموا أساليب 2005 ؟!! لسه الأيام جايه كتير، ولأنكم سلطة مستبدة فطبعا هتخالفوا الدستور الفاكس بتاعكم زي ما حتى مبارك كان بيخالف دستور 1971.. الاستبداد مش هيحميكم، والنفاق مش هيحمي، والأحزاب اللي عمالة تنافق دلوقتي، ولسه في جولات كتير.. صبرا صبرا».