النشطاء يسخرون من "أتوبيس الواي فاي".. أبو نور: اللي نازل المحطة الجاية يدوس لايك ويجي على الباب.. أحمد أهلاوي: كفاية يا أسطى ما تركبش حد النت بقى بطيئ.. عبد الرحمن: الراوتر هيتسرق من أول يوم

حالة من السخرية اللاذعة انتابت نشطاء تويتر بعد إعلان، هيئة النقل العام عن توفير أتوبيسات مزودة بخدمة النت اللاسلكي ”wifi” وشاشات تليفزيونية، وبينما نادى بعضهم محاكيًا طريقة الحوار مع سائقي التوبيسات "الباسورد يا أسطى"، دعا آخرون الحكومة لأن تصلح أحوال الأتوبيسات أولًا.

وعبر الهاشتاج الساخر #أتوبيس_الواي_فاي تعددت تعليقات النشطاء على النحو التالي:

أحمد فتحي" لو عملوا أتوبيسين تلاتة كمان واي فاي أنا أتوقع أن عوائد وزارة النقل من الأتوبيسات هاتكون أكبر من #مصر للطيران #أتوبيس الواي فاي"

عمر ياسر" بيقولك سرعه النت ٦ ميجا يعني أسرع من الأتوبيس ذات نفسه #أتوبيس الواي فاي.. الباسورد ايه يا سطى؟..رايح فين؟.. الهرم.. الباسورد هرم اتنين اندرسكور"

أحمد أهلاوي" كفاية كدا يا أسطى ماتركبش حد تاني، النت بقى بطيئ...!! #أتوبيس الواي فاي"

بسنت أحمد" سؤال فيزياء ثانوية عامة 2015 #أتوبيس الواي فاي يسير بسرعة 40 كم/ساعة وعدد ركابه 33 راكب اذكر اسم السائق وباسورد الواى فاى في هذا الأتوبيس"

حسن ميركافا" سوء استخدام وسخرية... اقفل يا أسطى الواي فاي عليه #أتوبيس الواي فاي"

عبد الرحمن السابع عشر" واي فاي أون بورد؟! ده الراوتر هيتسرق من أول يوم! #أتوبيس الواي فاي"

محمود أولجي" يا جماعة اللى بيعمل داونلود يرحم أبونا النت بطئ... مش أتوبيس أبوه ده نقل عام #أتوبيس الواي فاي"

أبو نور" حملة اقفل وخلي النور مفتوح #أتوبيس واي فاي اللي نازل المحطة الجاية يدوس لايك وييجي ع الباب"

أحمد الهندي" عندك وسائل مواصلات غير صالحة للاستخدام الآدمي ومش مغطي بيها الاستهلاك اليومي ويقولك عندنا أتوبيس فيه واي فاي"

محمد كامل" الحكومة عملت أتوبيس نقل عام فيه واي فاي وجي بي إس وينفع تدفع التذكرة بالفيزا، طب هو لو حد معاه فيزا هيركبه ليه أصلا"

أحمد السايس" مصر بقي فيها أتوبيس بـ واي فاي ده أنا طولت في الجيش بقي"

سلمى زكريا" طب والله أنا ركبت ميني باص (أتوبيس / حافلة صغيرة) في مصر من سنتين وكان فيه واي فاي وجربته بس قعد أسبوع تقريبا. بس هو شخصيا مكانش آدمي"

وليد نوارا " أتوبيس به خدمة الإنترنت واي فاي ده فكرة رائعة وليست مكلفة ويا ريت تتعمم"

حسن فاكهة" أتوبيس بـ واي فاي طب دي حاجة كويسة، بس هي الناس الغلابة اللي بتركب هتحتاج الأوبشن ده !! #اتوبيس الواي فاي"

مروة رضوان" نشطاء لأتوبيس واى فاي:"أتوبيس واي فاي يعني النت يفصل ف بيتكو تنزل تبات ف الأتوبيس"

أحمد خطاب" واي فاي في أتوبيس نقل عام...واي فاي، وديه تتنطق ازاي؟"

Do2do2Ahmed "وليه نقعد في كافيه لما ممكن نركب أتوبيس فيه #واي فاي"

أحمد عبد الوهاب" قال لك أتوبيس بـ واي فاي..طب متأكلو الناس الجعانة الأول"

خالد عبد الرحيم" قال لك أتوبيس فيه واي فاي! طب معلش سؤالين فنيين:

سـ1: لو أنا كالعادة راكب برا الأتوبيس ومتشعبط في كتف إللي متشعبط في كتف إللي واقف على الباب، النت هيوصل لي برضه ولا لازم أكون راكب جوا الأتوبيس؟؟

سـ2: لو أنا قاعد كاحتمال يعني مش أكتر في الأتوبيس وعاوز أشتغل على النت يا ترى النت هيوصل لي من كمية اللحم المحشور في الأتوبيس ولا مش هيوصل؟؟"

سلمي أسامة" أتوبيس واي فاي أيه.. هي خلاص مصر مدلعة شعبها أوي وكان الواي فاي اللي ناقصها.! بس أهو هينفع برده"

mabedelrahman "قالك أتوبيس واي فاي ودي الخدمة شاملة التفجير ولا المراقبة بالصلاة على النبي!"