ننشر أول حوار بين متظاهر وموظف حجز مظاهرات !

دار حوار بين محرر هريدي نيوز وأحد اصدقائه حول قانون التظاهر الذي نشر في الجريدة الرسمية وبات حقيقة على ارض الواقع.
محررنا سأل صديقه ايه رأيك في قانون الطوارئ ؟
رد الصديق ياراجل دا آخر مسخرة.. ببساطة كده تعالي احكيلك من وحي الخيال ماذا لو واحد عايز ينظم مظاهرة.. هايعمل ايه وهو بيقدم الطلب للموظف.. أكيد هيبقي حوارهم كده:

المتظاهر: السلام عليكم
الموظف من تحت النظارة: وعليكم يا سيدي.. خلصنا عايز ايه ؟
المتظاهر: عاوز تصريح تظاهر لو سمحت.
الموظف وهو يقلب أوراقه: الهدف من المظاهرة يا محترم؟
المتظاهر: إسقاط النظام إن شاء الله .. وممكن لو مفيش مشكلة نولع في الداخلية.
الموظف وهو يكتب في استمارة تظاهر: إسقاط النظام وإحراق الداخلية".. فيه حاجة كمان في المظاهرة يا محترم علشان أي زيادة عليها غرامة عدم تبليغ؟
المتظاهر: لأ يا فندم كده كويس أوي بس ممكن نهتف " عيش.. حرية.. عدالة اجتماعية "؟
الموظف وهو بيتجظع على الكرسي: اهتف يا سيدي ماهو الكلام ما علهوش رسوم
المتظاهر: أمشي بقى كده يا استاذ واللا مطلوب حاجه تاني؟
الموظف بيعدل نظارته: تروح يامحترم لمدام عفاف في الدور الرابع تاخد دمغة إسقاط أنظمة وتلزقها على الطلب ده .. وبعد كده تروح تدفع في الخزنة في المبني التاني خمسة وأربعين جنيه تأمين لجدية الحجز.. ولو اتلغت المظاهرة مش هيرجعولك.. وبعدها تجيب لي الوصل والطلب اللي عليه دمغة إسقاط وتيجي تدفع عند الاستاذ اللي قدامي ده مبلغ 150 جنيه لزوم توريد بنزين للملوتوف اللي هاتحرق به الداخليه
المتظاهر: في حاجة كمان؟؟
الموظف وهو بيرزع القلم على الورق: ايوه يا حضرة تطلع على البنك الأهلي تورد 4000 جنيه دعم تسليح وقمع وبالمره تورد 20 جنيه بدل دخان.
المتظاهر: دي آخر حاجه ؟!
الموظف: كده تمام ونتمني لمظاهرتكم دوام التخريب والتكسير... أي خدمة مني .. لازم تحجز مستشفي الأول وعندي ليك دكتور خصوصي رخيص وكويس.
المتظاهر: شكرا معانا دكاترتنا.. سلام عليكم
الموظف: تحت أمرك يا حبيبي.. تعالي كٌل يوم.......