التدخين " يعمر الطاسة" ويخرب "الجيوب"
"بلاش تدخن لو سمحت" كلنا يا بنسمع الجملة دي يا بنقولها، أنا مش هتكلم عن أضرار التدخين لأن كلنا عارفينها زي السرطان وأمراض القلب وتصلب الشرايين، والأهم من كل ده إنها بتخرب الفلوس... وكل الكلام اللي إحنا عارفينه، بس أنا مشكلتي معاك إنت ياللي بتدخن سواء في المواصلات العامة أو الأماكن العامة إنك بتقوم بأزية غيرك.
فيه مواقف كتير بتحصل معانا جوه المواصلة العامة -كمثال- زي مثلا المدخن يطلع السيجارة بايده بره الشباك مفكر أن الريحة مش هتوصل لجوه العربية أو مثلا يحطها تحت بين رجله علشان يشربها مفكر أن محدش شامم ريحة دخان السيجارة.
وأنا حبيت أعمل حوار صغير وأعتقد إنه تكرر مع ناس كتير أوي بين مدخن وغير مدخن داخل مواصلة عامة
الغير مدخن: لو سمحت يا باشا ممكن بلاش السيجارة عشان(عندي حساسية من الدخان).
المدخن:السيجارة بعيدة عن حضرتك.
الغير مدخن: يا باشا أنا شامم ريحتها وتعباني
المدخن:يوووووه أهي رميتها
الغير مدخن:شكرا بس انا عندي فعلا مشكلة صحية.
ده حوار مختصر وبسيط أوي لكن في الحقيقة في حوارات بسيطة بس بتتحول لمشكلة كبيرة جدا وأنا من رأيي إن السائق قبل ما يطلع بالعربية بتاعته ينبه على كل الركاب ويقولهم "لو سمحتم يا جماعة محدش يدخن في العربية"، يارب ناخد بالنا.
