13 نصيحة لحياة افتراضية هادئة

- لو حد كاتب ستيتاس ما فهمتهاش، ما تخشش تعلق وتسأله معناها، إنك ما فهمتهاش معناها ببساطة إنها مش مكتوبة ليك.. دعها تمر.. ما فاتكش القطر.
- لو إنت محجبة ومش عايزة تفتني الناس بصورتك ما تحطيش صورة واحدة حلوة وتفتني الناس بيها برضه، لو منطقك إنك خايفة من ذنب كده ها تبقي لبستيه برضه.
- ما تعملش لحد تاج لصورة هو مش فيها.. نداء بدأ مع بدء اختراع اللعنة المسماه بالتاج.
- لو حد كاتب ستيتاس بتضحك ما تخشش تعلق عليها بإفيه ثاني إلا لو فعلا فعلا فعلا بيضحك قوي قوي.
- ما تطلعش غضبك من أبوك، مراتك، من فشلك في حياتك، في اللي حوليك على الإنترنت لمجرد إنهم كتبوا حاجة لا تلائم بؤسك.
- لو ناوي تعمل إضافة لحد ما يعرفكش على الأقل حط صورتك الحقيقية، ومعلومات عنك، مش ها يعملك إضافة يعني لأن خطك حلو على الفيس بوك.
- لو في ستيتاس طويلة قوي مش منطقي إنك تعملها لايك قبل ما تقرأها، وقبل ما يكون أي حد لحق يقرأها أصلا، اللايكات المقدم دي سر عجز العلماء عن فهمها.
- الشتيمة غير المباشرة بتبان، واحد كاتب حاجة ما عجبتكش، تقوم داخل وشاتمه - قال يعني- بشكل مستتر، بإنك تبدأ الشتيمة بـ "الناس اللي بتقول كذا كذا.." وتشتم، هياخد باله على فكرة، اشتمه مباشرة أحسن.
- ما تشتمش حد على الإنترنت وإنت لو قابلته في الحقيقة مش ها تقدر تشتمه، اشتمه فعلا لو كنت ها تشتمه نفس الشتيمة لو كنت واقف معاه جوا أسانسير مثلا.
- لما تلاقي حد كاتب "ناقص ٣ أيام" وهو مش قايل ناقصين على إيه، ما تخشش تسأله سيبه، التجاهل ها يكون أفضل انتقام ليه.
- ما تتناقش نقاش عميق جاد على الإنترنت، بيبان صدامي وعدائي أكثر، استنى لما تقابل صاحبك واتناقش معاه في وشه.
- إيه معنى إنك تعمل لحد بلوك وإنت بتخش من بروفايلات ثانية تشوفه كاتب إيه؟ يا تشيل البلوك يا تكون قد بلوكك.
- ماسموش "فيس" مثلا وأبوه اسمه "بوك" فبقى صاحبك قوي فبتقوله "فيس" على طول. اسمه "فيس بوك".. "فيس بوك".. عود لسانك عليها هاتلاقيها سهله.