مينا مجدى ينعى "مريم" بقصيدة "وحياة الفستان الأبيض"

طرح الشاعر الشاب مينا مجدي، قصيدة رثاء جديدة بعنوان "وحياة الفستان الأبيض"، ينعي فيها الشهيدة مريم مجدي أصغر ضحايا الاعتداء الإرهابي الغاشم على كنيسة السيدة العذراء بمنطقة الوراق، والتي لم ترحم رصاصات الإرهاب طفولتها البريئة التي لم تتجاوز ثمانية أعوام.. ويقول مينا في قصيدته:

"وحياة الفستان الأبيض
اللي هياكل منك حته
وحياة الدم اللي مبقع
واللي مغرق مليون حته
وحياة الضحكه اللي ف صورتك
لما مسكت الصوره وبوستك
وحياة دباديبك وعروستك
وحياة الأوضه المقفوله
بعد غيابك
وحياة كراستك وكتابك
وحياة فصلك
والدكه اللي قعدتي عليها
والرسمه اللي انتي رسمتيها
وحياة الفرحه اللي ف قلبك
وحياة لعبك
والجرح اللي عشانك واجع
وحياة كل ما فيكي يا مريم
حقك راجع !

عارفه يا مريم..،
انتي خساره فـ عالم فيه الناس وحشين
انتي ملاك،
صعب يعيش مع بني أدمين
والسما أحسنلك بكتير
يعني الموت يا حبيبتي فـ صالحك
جيتي عشان تحضري إكليل
واتاريه فرحك
والأفراح ف الملكوت أكتر
عارفه يا مرمر
انتي بقيتي شهيده كبيره
مع مارجرجس بقي والعدرا
وملايكه حواليكي كتيره
بابا يسوع شايلك على حجره
وهتنسي فـ حضنه التعويره
وهيفضل يلعب وياكي
ويسيبلك على خدك بوسه
بعد ما كنتي من المعازيم
ربنا حب تكوني عروسه !