المحاكمة

لم يتمالك صديقي نفسه من الضحك عندما أخبرته أن محاكمة مرسي ستكون في معهد أمناء الشرطة، بينما كانت محاكمة المخلوع مبارك في أكاديمية الشرطة!!

وبعد أن انتهى من وصلة الضحك اللي مسكته قال: حتى المحاكمة فيها خيار وفقوس ولا هي فرق رتب يعني!!

لم تفلح محاولاتي في إقناعه أن تأمين معهد الأمناء أيسر على الداخلية من تأمين الأكاديمة، ثم إنها جنب سجن طرة يعني مش هنحتاج طيارات ولا عربيات ترحيلات ولا يحزنون، يعني الميت جنب الترب كفن وادفن على طول!!

لكن لم أسلم من خبث تفكيره عندما قال لي لأ، هو استحقار.. اللي بيحصل للمعزول دا استحقار له والداخلية قصدها تهينه!!

أخبرته أن الداخلية ليس بينها وبينه تار، وهو لو متهم هيستاهل اللي يجراله والمحكمة دورها تثبت كدا.

عاد لخبثه مرة أخرى وقال أنا بتكلم على الشكليات زي ما كان حسني رئيس مرسي برضه رئيس، وإيه كمان منتخب وزي ما حسني اتحاكم في أكاديمية الشرطة يبقى رأس برأس زيه بالظبط ومحدش أحسن من حد..

قلت له: طب والمحاكمة عايزها إزاي بقى..
قال: برضه زي ما دا خد براءة دا كمان ياخد براءة..

وبعد أن ارتبت في طريقة تفكيره ومنطقه الذي أوصلنا إلى إن المعزول لازم ياخد براءة سألته هو إنت إخواني..

تنحنح ثم تنحنح ثم عطس ثم مصمص شفايفه ثم قال: أبدا بس أنا بتكلم في الأصول يعني....

فقاطعته قائلا: الفجل لما استوى قال للخيار يارابعة!!