غانا العيد أهو غانا العيد !
والناس مستنية الإجازة ومجهزة الفتة ولتر الحاجة الساقعة جمبها ولب وسوداني، وقالت أخيرا بقي هناخد إجازة يوم الماتش والعائلات متجمعة.. عشان تشوف اللعيبة "بيتدئلجو"، وأبو تريكة يتشملل ويتنحرر ويجيب جون واحد.
ويضيعوا الفرصة والتانية ولا كأنهم كانوا واكلين فتة بايتة وحمضانة.. طب يعني الزملكاوية واخدين على كدة ودمهم ما اتحرقش قوي وفيه بعضهم شمتان وقالك دوقوا بقي من اللي احنا بنشوفه كل ماتش.
لكن فيه أندية تانية مش واخدين على كده.. ده غير أن المصريين كلهم كان نفسهم يلاقوا حاجة يفرحوا بيها.
دلوقتي أعتقد أن أغنية مرحب مرحب بالعيد.. ستتغير معالمها وستظل هذه الهزيمة لصيقة العيد الكبير لسنوات وسنوات وسيتم تغيير الأغنية إلى " أهلا أهلا بالعيد..غانا العيد أهو غانا العيد"!
