"مفيش فايدة".. شعر لـ منتصر حجازي
مفيش فايدة
كأن أبويا لا اتوضي
بماية زمزم الفضة
ولا زكيَّ
ولا برجله دخل مكة
وجابني زي كل الناس
وعلمني وكبرني
ورباني ومات وخلاص
كأن الأرض مش دايرة
كأنك يا حُسين لسه
بتتحاصر
وكأنك يا يزيد لسه
بتتجاسر..
والخليفة
صاحب العين المخيفة
ساب ف حلق الخلق غصة....
كأن مواكب العشاق
ماهيش سايرة
لحد مقامك الزينبي
وأنا مش نبي
الجرح ساند على السكين
زينب تشوف رأس الحسين
تبكي على الدم الذكي
يا خالق الكون بالحساب
الجبر قد الاختيار مرتين
والخلق رايحة وجاية
مش حاسين
بالألم اللي جوا القلب عاصر
كأنك يا حُسين لسه بتتحاصر
والمرارة من يوميها لسه زايدة
والقهاوي لسه سادة
والكالعادة..
مفيش فايدة
مفيش غير الحُسين لسه
لوحده بيكي في المحراب
وبقية العالم كداب
ولسه يزيد
بيعلم الناس النشيد
كلام كداب..
وأنا ماشي
باهز الأرض من خوفي
ومتضايق عشان شوفي
معدي بعيد
يوم الحساب
يا كربلاء الإبتلاء أسباب
وأنا ويا الحسين ماشي
على دربه باموت عطشان
باموت عطشان
عطشان
