"أنا الرسمة اللي في الزنزانة" شعر محمد عاطف
بنتلاقى فى نظرة شوف
ونتباعد أوى من الخوف
ونتساير كلام أخرس
يخاف الحبس م المهتوف
أنا الرسمة اللى فى الزنزانة محنية
ونور الشمس بيركز على عنيا
يبان الذل كالعادة
تبان الدمعة متعادة
يسيبنى فكرة مرمية
أنا المحبوس وأنا السجان
أنا اللي بانى لطوب خراسان
مالوش أبواب
وبابه وحيد هنا فى قلبى
فى يوم ما الثورة تلمحنى
راح أرمى الذل من كتفى
وأقوم بردان
تدفينى عيون الناس
بعد ما تقتل السجان
