أبين زين وأضرب الودع
«أبين زين.. وأقول على المستخبي واللي مش معروف.. وأضرب في ودعي.. وتمللي بأدعي.. والمستخبي بأقوله ع المكشوف».
تسلم ياجيشنا العظيم.. اضرب أعادينا.. واهزم فلول التتار على رملنا في سينا.. وقول لهم أنتو مش فاهمين خطاوينا.. ومفكرين راح نخاف منكم وتخدونا.. لدربكم وف جحيم النار ترمونا.. كان ظنكم تحكموا بالسيف تخلونا.. نعيش في بحر الشكوك نقتل في بعضينا.. لكن خاب ظنكم لما واجهتونا.. وعرفتوا جيش مصر فيه أبطال بيحمونا.
وودعي بيقول نصيحة للي خانونا.. ونسيوا فضلك عليهم لما نادونا.. وقالوا بنضيع وفتحوا حدودنا أكلونا.. وصبرنا لكن ما فيش فايدة وحاورنا.. يمين شمال ظنهم في يوم حيعزونا.. وياخدوا من سينا حتة.. لكن عين جيشنا صاحية للي حسدونا.. يعرف يرد بشجاعة ع اللي خدعونا.. يامصر جيشك معاه شعبك يصونونا.. من غدر كل اللي ظنوا بمكر حبسونا.. بخندق الالتفاف ودموع يبكونا.. لكن جيشنا وشرطتنا وناس سينا.. يثبتوا أنهم أبطال أراضينا.. وكل يوم فيه شهيد بدمه يروينا..
دى مصر طول عمرها تهزم أعادينا.. ومهما طال الكفاح في النار تلاقينا.. أبطال ونرفض نسلم روحنا بأيدينا.. أصل إحنا أولاد تحتمس وحتشبسوت.. جنود مينا.. لنا تاريخ فيه لنا أمجاد تخلينا.. نرفع رؤوسنا وكل الناس تحيينا.. وفي الخيام يابلد تعظيم سلام للجيش.. والشرطة اللي بيرووا بدمهم سينا.
