يوم الزينة
"موعدنا يوم الزينة".. قالها فرعون الكبير للنبي موسى عليه السلام.. دلوقتي فرعون الصغير بيراهن على يوم الاستفتاء ومش خايف طبعا من أنبية الثورة وشبابها عشان معاه شوية سحرة فشر سحرة فرعون.. واحد عريان والتاني شاطر والتالت بديع.. حاجة كدا بسم الله ما شاء الله تتفات ليهم مخضرة.. الحشد شغال على ودنه من الباب للباب.. يعني من باب البيت لباب اللجنة والتوصيل مجانا "ديرفري يعني".. وكمان لو مش فاضي خلي عنك أنت.. يا راجل هو في فرق بينا دا إحنا هنوديك الجنة.. تعابين السحرة الجدد كلها مدهننة.. أصلها غرقانة زيت وسكر.. دي مش تعابين دي حيات ومن النوع الدسم عمالة تاكل في أصوات لحد ما كَّرعت.. لكن هنشوف يمكن المعجزة تتحقق تاني وسحرة الثورة يرموا بتعبان كبير ياكل تعابينهم.. لكن مستحيل طبعا إن سحرة الفرعون الصغير يخروا ساجدين قدام إرادة الشعب عشان هما من طينة تانية.. شكلهم كدا مش ولاد تسعة زينا.. شايفين إن يوم الزينة آخر فرصة عشان يتلموا على التورتة الكبيرة وياكلوها براحتهم.. لكن يا رب بحق جاه النبي لو وصلت للتورتة خليها تقف في زورهم وما يلاقوا حد يلحقهم قادر يا كريم.
