أنا بصلي يا ولاد دين الـ......

هو الناس جرالها ايه؟!
تساؤل عادى من راجل كبير عشان عيل زقه وهما طالعين المترو.

لكن مكنش عادي عند الواد اللي يدوبك لسه شنبه خاطط في وشه وتقريبا لسه بياخد المصروف من ابوه
اتلفت للراجل وخده في صدره ومنعه أن يطلع المترو أصلا لحد ما الباب اتقفل وقاله إنت بتقول إيه يا راجل إنت.. إنت بتشتمني؟

الراجل قاله والنعمة ما شتمتك

قاله اه بحسب

حدث هذا دون أن يتدخل أي حد من المارة ويمنع استئساد العيل الطايش براجل تقريبا من سن جده مش هنقول ابوه..

إيه المشكلة هنا بقى.. هل هي في العيل دا اللي هنقول عليه مترباش، ولا الراجل الكبير هو المشكلة لأنه إيه أصلا وداه هناك!!!!!!!

نجيبها من ناحية تانية ونقول هل نحن في حاجة إلى ثورة تنظم أصول الحكم والسياسة ولا احنا محتاجين ثورة في الأخلاق.. سامعك على فكرة وأنت بترد علىّ وزعلان قوي بتقولي اخلاق يا عم احنا مفيش اكتر من الشيوخ عندنا ومفيش جامع في أي صلاة إلا لما بيكون على تمة عينه مليان...

خلاص طب لو هي زي ما بتقول كدا ليه اللي بيحصل دا.. ليه التدين عندنا شكلي بس يعني أصلي وأصوم وعادي ممكن اشتم واسب الدين وببساطة يقولك دي نقرة ودي نقرة..

وعلى ذكر النقرة والنقرة كان لي صديق مشفتوش من زماااان وخطفت رجلي لحد بيته والعشا ادنت علينا واحنا في بيته لقيته قام جاب المصلية وفرشها طبعا انا دماغي راحت في خمسين سؤال انا عارف من زمان أنه بيصلي بس مش بالحرص دا يعني لو الظرف دا حصل قبل كدا زمان كان هيقولي العشا ممدوة أصليها بعدين.

وممكن ينام وميصلهاش لكن الحرص إنها تبقى في التو واللحظة دا كانت جديدة مع شوية حاجااات تانية لاحظتها عليه زي زبيبة الصلاة الل قبت في اورته.. قلت عادي كل شي بيتغير.. المهم اقام الصلاة وسمحلي أن اتوضا وصلينا وفي الركعة التانية تقريبا ابنه الصغير اللي لسه يدوبك بيتعلم المشي جه قدامنا على المصلية وعمل اللي بيعملوه العيال الصغيرة ورشها مية قدامنا كتمت ضحكة كانت هتبطل الصلاة وحاولنا نتجنب المصلية وأول ما قال السلام عليكم ورحمة الله اتلفت لمراته وقلها ما تحوشي ابنك يا ولية انا بصلي يا ولاد دين الـ...........
فعلا احنا محتاجين ثورة أخلاق!