"مبارك": "استلمت البلد مدينة بـ 57 مليارا..و"خدتكوا 43 مليون واحد بقيتوا 91 مليون".."القذافي" أجر شخصاً لقتل الملك السعودي..قطر هتجيب يهود بـ"باسبورتات أمريكية" ليستوطنوا السويس..وسر الـ9 مليارات
واصلت الزميلة "اليوم السابع"، نشر تسجيلات صوتية للرئيس الأسبق حسني مبارك خلال حديث له مع طبيبه الخاص وأحد ضباط الحراسة، كشف خلالها العديد من الأسرار حول استلامه لمصر "متفككة وعليها ديون تبلغ 57 مليار دولار"، وقت رئاسته للبلاد في ١٩٨١، كما يكشف عن تأجير الزعيم الليبي الراحل معمر القذافي لشخص من أجل قتل الملك السعودي عبدالله بن عبدالعزيز، وحقيقة امتلاكه هو وأسرته لـ9 مليارات جنيه.
قال الرئيس الأسبق محمد حسني مبارك: "أنا كنت مستلم البلد متفككة عليها ٥٧ مليار دولار ديون.. مكناش قادرين ندفع قسط سنوي من الفوائد.. وكان لازم نشتري أدوية وقمح في السنة فوقعنا مع صندوق النقد شوية وخلصت من صندوق النقد طلعلي جورج بوش الأب.. قولتله في اليابان مرة في زيارة يا جورج انت مبتساعدنيش مع صندوق النقد ده ليه؟.. فرد قالي لا إزاي؟.. قولتله الصندوق كل سنة عايز يرفع الفايدة يا إما يربطها برفع الدعم وأسعار البنزين وأنا مقدرش أعمل الحاجات ديه؟.
ويضيف في الحلقة الثالثة من حديثه المسجل والذي تنشره الزميلة "اليوم السابع" غدا: "قولتله قوم كلمه دلوقتي كانت الساعة حوالي ١٢ بالليل هناك وبتوقيتهم ١٢ الضهر.. فكلمه وقاله أقبل بالبرنامج اللي حطاه مصر دون تغيير.. ساعتها كانت حكومة الدكتور عاطف صدقي فكلمني بعدها وقالي هو إيه اللي حصل؟ بعد ما كان الصندوق متشددا معانا دلوقتي بيقبل برنامجنا بلا تعديل؟ فعلق الطبيب الخاص قائلا: "كانت مهمة العلاقات الدولية ديه في إدارة البلاد".
يقول الطبيب لمبارك: "بيقولوا على المنايفة عندهم درجة ذكاء عالية ياريس"؛ فيضحك مبارك بصوت عال لفترة، وعاد الطبيب ليكمل حديث المدح: "بقولهم شوفوا المنايفة كانوا عاملين إيه في البلد.. الرئيس السادات وبعدين الرئيس مبارك تعالوا شوفوا الشراقوة عاملين فينا إيه؟" نسبة إلى مسقط رأس الرئيس المعزول محمد مرسي".
وفي تسجيل آخر يكشف مبارك؛ عن مفاجأة جديدة، حيث قال، إن الزعيم الليبي الراحل معمر القذافي وصلت ذروة خلافاته مع العاهل السعودي الملك عبدالله بن عبدالعزيز إلى تأجير قاتل لاغتياله.
وقال: "القذافي ده كان باعت واحد يقتل الملك عبدالله واحنا مسكناه.. الواد جاي وبعتله الفلوس عن طريق شركة سياحة من السعودية هنا علشان يصرف منها رحنا عرفنا الموضوع فجبناه فكان عايز يسافر تاني السعودية ومسكناه ومنعناه ومرضيناش نسفره السعودية؛ فراح طلب يزوره القذافي وقالنا انتو منعينه ليه من السفر.. فرديت إحنا منعناه علشان متقتلوش وتجبلنا مصيبة كلنا صراحة كده فراح سكت".
ويكمل مبارك ضاحكاً: "منطقش"، فرد طبيبه الخاص: "السكوت علامة الرضا"، فضحك مبارك وسأله الدكتور حضرتك كنت فاهمه كويس؛ فرد الرئيس الأسبق: "أنا كنت فاهمه كويس وفاهم أبوه.. أنا لما أتعامل مع واحد لازم أفهمه كويس".
وينتقل الرئيس الأسبق للحديث عن مشروع النهضة الإخواني، واصفا إياه بأنه أكبر كذبة في تاريخ مصر، وقال: "مشروع النهضة اللي قدمه الإخوان أكبر كذبة في تاريخ مصر".. وقاطعه طبيبه الخاص: هو فيه مشروع أصلا. فرد مبارك: "بصرف النظر عن الأمر الخطر في تمويل المشروع من دول عربية أو شركات أجنبية؛ وقطر هتجيب أمريكان يهود بباسبورتات أمريكية ويعملوا مشروعات ويستوطنوا عندنا.. ويعملوا مشروعات سيئة زي محور قناة السويس وتأجيرها".
وعرج مبارك إلي السابع ملف الأمن والأمان والغلاء والمعيشة الصعبة التي يعاني منها المصريون بعد ٢٥ يناير؛ حيث أنه كان يسعى بكافة السبل من أجل توفير لقمة العيش للمصريين.
يبدأ ضابط الحراسة حديثة قائلا: "شفت مرسي يا ريس لما راح خطب في السودان وقالك أبشروا يا أهل السودان فمصر نهضت.. يجوا يشوفوا النهضة والغلاء والمعيشة الناس نفسها الدنيا ترجع زي زمان وتعرف تعيش في أمان.. الناس مش لاقية تاكل مش لاقيين بنزين".
وقال مبارك: "وفي الآخر يقولك النظام الثوري والثورة؛ أنا استلمتهم ٤٣ مليون في ١٩٨١ دلوقتي بقوا ٩٠ مليون"؛ يرد ضابط الحراسة: "كل الناس بتقول كده إن شاء الله النظام السابق يرجع ويعمل اللي يعمله بس نعيش في أمان ومستقرين".
ويضيف مبارك: "أنا كنت بلف وبجيب فلوس من كل حتة"؛ ويواصل ضاحكًا: "ومبطلبش ومبشحتش زي الكلام اللي قاله القذافي ده مبارك كان بيشحتلكوا فلوس؛ أنا فاكر الملك فهد بعتلي مرة ٢٠٠ مليون دولار في ١٩٨٩ كنت في استراحة برج العرب لقيت البنك المركزي بيقولي اتحولنا مبلغ ٢٠٠ مليون؛ كلمته قاللي أنا عارف اللي عندك.. الدنيا عندكوا صعبة شوية"، رد ضابط الحراسة: "كانوا بيحبوا مصر وبيحبوا حضرتك".
وأضاف مبارك: «آه ده في حرب الخليج إداني ٢ مليار ونصف مليار دولار؛ والكويت أدوني مليار و٣٠٠ مليون دولار"؛ فقاطعه طبيبه الخاص: "ما هما دول اللي بيقولوا عليهم إنك حولتهم لحسابك الخاص وصرفتهم"، تجاهل الرئيس الأسبق هذه الجملة واستكمل قائلا: "ده غير ٥٠٠ مليون دولار قالوا اشتروا بيهم اللي انتوا عاوزينه وهاتولي الشيكات وأنا أدفعهم.. ده الملك فهد.. أيام ما كانت الملايين ملايين مش زي دلوقتي.. ويضحك فيضحك الطبيب الخاص ويؤمن على كلامه قائلا: "دلوقتي الملايين مع الدكتور ومع كل الناس الغلابة أنا معايا ٥٠٠ جنيه من فلوس العمليات".
ويتابع: "خسارة مصر يتعمل فيها كده والله ده يدل على أنهم كانوا بيحبوا حضرتك أوي؛ فيرد مبارك: "أصلي أنا لما كنت بتعامل معاهم مكنتش بتكبر وبحترمهم ومحبش أشتم"، فيتدخل الطبيب الخاص: "آه مهمة النقطة ديه أوي القذافي كان بيقعد في جامعة الدول العربية يشتم الناس فتلاقي الملك عبدالله هاج عليه ورد".
وكشف مبارك، حقيقة ما أثير بشأن امتلاكه هو وزوجته سوزان ثابت، ونجليه "علاء، وجمال" وزوجاتهما هايدي راسخ، وخديجة الجمال 9 مليارات جنيه، وفقا لتقارير هيئة الرقابة الإدارية، وجهاز الكسب غير المشروع، والجهاز المركزي للمحاسبات.
ويقول "مبارك"، في حوار مع طبيبه الخاص وفقاً للتسجيلات الصوتية التي تنفرد بنشرها الزميلة "اليوم السابع": "الشيخ زايد كان مدى قرض لروسيا أيام حرب الخليج بمليار يورو فقلتله عايزين نشتري طيارات هليكوبتر بيهم من روسيا طيارات قوية، مسألش ليه ولا بكام علي طول قالي نفذ وأيام حرب الخليج شفته كانوا شاريين طيارات إير باص من فرنسا فراح باعهم وإداني بيهم معونة ٩ مليارات موجودين في البنك المركزي في حساب الدولة".
قاطعه الطبيب: "ما هما بيقولوا مبارك عنده ٩ مليارات".. رد الرئيس الأسبق، "ما هما دول".. فأمن الطبيب علي كلامه قائلا، "أنا قريت تصريحات لمدير البنك المركزي في الأهرام من ٣ شهور بيقول فيها، إن مفيش مليم خرج من مصر ولا شنط ولا حاجة ولما سألوه متكلمتش ليه وقتها قال، إن الموجة كانت عالية ومقدرش أتكلم".
فأوضح مبارك، "البنك المركزي ده بنك الحكومة الي يحط فلوس فيه تبقي بتاعة الحكومة ..فكان الشيخ زياد يحولي علي البنك المركزي مش على بنك تجاري والبنك المركزي ميفتحش حساب خاص لحد وجيه.. بتاع النيابة بيحقق برضه قولتله انت عاوز إيه شوف أنا هقولك على كل حاجة علشان ترتاحوا هقولك اتحول للسعودية كام ولفلان كان ومش عارف ونرجع الفلوس بقي.. قالولي لا إنت كده تعمل أزمة في الاحتياطي النقدي في البلد.. طيب أومال إيه الله يخرب بيتكو انتو عاوزين تطلعوني حرامي".
كان المستشار محمود الحفناوي، المحامي العام بالمكتب الفني للنائب العام، قد قال: إن قيمة الثروة التي حققها الرئيس السابق، حسني مبارك، وزوجته سوزان ثابت، ونجلاه «علاء، وجمال» وزوجاتهما هايدي راسخ، وخديجة الجمال تبلغ 9 مليارات جنيه، وفقا لما أكدته تقارير هيئة الرقابة الإدارية، وجهاز الكسب غير المشروع، والجهاز المركزي للمحاسبات.
